I aroha mai te Atua i tō te ao

’Ua here hope roa tō tātou Metua i te ao ra ia tātou, ’ua tono mai ’oia i tāna Tamaiti, ia Iesu Mesia, nō te tauturu ia tātou ’ia ho’i iāna ra.

’Ua ’ite Iesu ē, tē vai ra te mau taime i roto i tō tātou orara’a e putapū tātou i te ’oto, te māuiui ’e te vai-’ōtahi-ra’a. E rave tātou i te mau hape ’e e mata’u ato’a tātou i te tahi taime. I roto i te ’ō nō Getesemane, ’ua mā’iti Iesu Mesia ’ia putapū i teie mau mea ato’a, ’ia ti’a iāna ’ia māramarama ’e ’ia tauturu maita’i roa ia tātou. ’Ua ’aufau ato’a ’oia nō tā tātou mau hara ’ia ti’a ia tātou ’ia tātarahapa. (Hi’o Alama 7:11–13.)

’Ua ’ite ato’a Iesu ē, ’ia tae mai te taime, e pohe pā’āto’a tātou. Te pohe e tuha’a mau ïa ’e te mātarohia o te orara’a. ’Aita rā te Atua i hina’aro ’ia riro te pohe ’ei hope’ara’a nō tō tātou ’ā’amu. Nō te mea ’ua hōro’a Iesu Mesia i tōna ora ’e ’ua ti’afa’ahou mai, e ora fa’ahou mai tātou pā’āto’a. Nō reira ’oia i mā’iti ai ’ia pohe nō tātou.

Tē pi’i nei tātou i te mea tā te Fa’aora i rave te tāra’ehara a Iesu Mesia. ’Ua ravehia teie hōro’a mo’a nō tātou ma te here. ’A ha’amana’o, i aroha mai te Atua i tō te ao ē ’ua tono mai i tāna Tamaiti, ia Iesu Mesia (hi’o Ioane 3:16). ’E ’ua aroha mai Iesu ia tātou ē ’ua hōro’a ’oia i tōna ora ’ia ti’a ia tātou ’ia ho’i fa’ahou e ora i pīha’i iho i te Atua.