Wan Niufala Stat

Alexandre bae i gat eit yia i no longtaem! Hem i glad tumas from se hem mo papa blong hem oli planem wan spesel betdei kaekae blong hem afta we skul i finis. Taem ol misinari oli kam blong kakae dina, Alexandre i talem long olgeta abaot naesfala joklet kek we hem i bin jusum.

“Bae yumi gat eit long olgeta wetem wanwan kandel long olgeta, i bitim long hemia we bae yumi gat wan kek nomo mo eit kandel!”

Elda Lauener i laf. “!Hemia i naes tumas! !Sevem sam blong mi!”

Afta long dina, ol misinari i tijim wan lesen abaot baptaes. Elda Doyon i tanem i go long Alexandre. “Taem yu kasem baptaes, !yu promes blong folem Jisas Kraes.” Hem i talem long Alexandre abaot baptaes blong hem mo serem testemoni blong hem. “Tabu Spirit i helpem mi blong mi filim hapi from se hem i dei we mi jusum blong folem Jisas Kraes.

Alexandre i no save wet long dei we bae hem i baptaes.

Be long naet taem hem i go silip, hem i faenemaot se i had blong hem i silip. Hem i laekem tingting ia blong stap klin mo niu. ?Be olsem wanem mi save stap klin afta we i kasem baptaes?

Long nekis moning, Alexandre i wokbaot go long skul wetem papa. “Yu kwaet we long moning ia,” papa i talem. “?Wanem i rong?”

Alexandre i pulum win, “ !Mi wis se bae mi save baptaes plante taem!

“?From wanem?” Papa i askem.

“Be bae olsem wanem nao bae mi stap klin afta we mi baptaes?” Alexandre i askem. “Mi stap fogetem ol samting oltaem nomo—olsem blong talem halo mo tangkyu long olgeta we i bigwan mo gat fasin blong save wet long taem long brata blong mi. Mi save se bae mi mekem mistek. Bae yu baptaes wantaem nomo, mekem se bae mi neva kam klin bakegen.

Papa i stop mo ae blong hem i kasem Alexandre. “Waow! Hemia i filim olsem se i tumas. ?Yu tingbaot taem we yumi tokbaot ol promes we yu bin mekem long taem blong baptaes?”

Alexandre i sakem hed blong agri. “Mi ting.”

“Taem yu kasem baptaes, yu mekem ol kavenan, o ol promes wetem Papa long Heven. Yu promes blong kipim ol komanmen mo folem Jisas Kraes. Afta long hemia, evri taem yu tekem sakramen, yu save tingbaot Jisas mo olsem wanem Hem i save helpem yu blong sakem sin.”

Ol ae blong Alexandre oli open bigwan. “Mekem se mi save filim klin olsem we mi bin kasem baptaes?

“Yes,” Papa i talem. “Papa long Heven i save se yu no stret evriwan, mo samtaem bae yu mekem ol rong joes. Be taem yu mekem sin, yu save sakem sin mo gohed blong traem blong folem Jisas. ?Hemia i saon olsem wan samting we yu save mekem?”

Alexandre i smael. “!Yes! Mi save se mi save mekem.”

Taem betdei blong Alexandre i kam, hem mo famli blong hem oli mekem betdei mo gat smol kaekae afta skul. Hem i naes tumas! Mo long taem blong baptaes blong hem, Alexandre i filim gud insaed taem hem i kamaot long wota. Hem i promes blong folem Jisas Kraes, mo hemia i naes tumas!

Long wik ia Alexandre i traem bes blong hem blong kipim ol niu kavenan blong hem mo traem blong stap kaen long smol brata blong hem. Be taem Sandei i kam, hem i harem nogud smol. Hem i filim se hem i save mekem moa gud joes long wik ia.

Taem we sakramen i pas, Alexandre i foldem ol han blong hem mo i benem hed blong hem. Kwaet nomo hem i askem Papa long Heven blong helpem hem blong mekem moa gud nekis wik. Hem i tingting long hamas Jisas i lavem hem mo olsem hem i wantem blong kam moa olsem Hem.

Taem hem i tekem pis blong bred long sakramen trei, Alexandre i gat wan wom filing blong pis insaed long hem. !Olsem we hem i filim long dei we hem i kasem baptaes! Papa i putum han blong hem raonem solda blong Alexandre mo i smael long hem.

Tedei hem i stat blong wan niu wik, mo Alexandre bae i traem bes blong hem—wetem help blong Papa long Heven.

Ol pikja droing i kam long Toby Newsome