“So Yu Bin Kasem Baptaes. ?Naoia Wanem?” Fren, Jenuware 2026, 36–37.

So Yu Bin Kasem Baptaes. ?Naoia Wanem?

?Yu bin kasem baptaes finis? !I gud ia! Papa long Heven mo Jisas Kraes, i glad tumas se yu mekem joes ia blong folem Tufala.

Baptaes i wan long ol fas step long rod blong yu long naesfala kavenan rilesensip blong yu wetem Papa long Heven mo Sevya blong yu. Hemia i sam long ol samting we yu save gohed blong mekem o stat blong mekem naoia we yu bin kasem baptaes.

Lisin long Tabu Spirit

Tingbaot taem we yu kasem presen we i Tabu Spirit afta long baptaes blong yu? Naoia Hem i save stap oltaem wetem yu taem yu stap jusum raet. Tabu Spirit oltaem i toktok long yumi tru long ol tingting mo ol filing blong yumi. Lisin long Tabu Spirit bae i helpem yu mekem ol gudfala joes mo faenem tru glad.

Tingting long Hemia: ?Wetaem nao yu bin filim Tabu Spirit? !I save wan big o smol eksperiens!

Sakem Sin

Taem Jisas Kraes i pemaot praes blong sin blong yumi, Hem i mekem i posibol blong yumi evriwan i sakem sin. Sakem sin i blong tanem baksaed blong yumi long sin, mo lukluk i go long Papa long Heven mo Jisas Kraes. Tufala i hapi taem yumi jusum blong sakem sin from se i helpem yumi kam moa kolosap long Tufala.

Tingting long Hemia: ?Wanem i wan samting we yu save mekem we bae i helpem yu tanem yu i go long Papa long Heven mo Jisas Kraes?

Tekem sakramen

Afta long baptaes, sakramen miting i iven moa spesel. Naoia taem yu tekem sakramen, yu stap riniu olgeta kavenan yu mekem long taem blong baptaes blong kipim mo mekem ol kavenan mo folem Jisas Kraes. Taem yu no kipim ol promes ia, sakramen i wan rimaenda blong evri wik we from se Jisas Kraes, yumi save sakem sin mo kasem fogivnes.

Tingting long hemia: ?Wanem i wan wei we yu save mekem blong mekem sakramen i spesel long wik ia?

Rere from Tempol

Tempol hem i wan tabu haos blong God. Long yia we yu gat 12, yu save go long tempol mo helpem ol narafala wan blong mekem baptaes blong olgeta ded. Afta, yu save mekem moa kavenan blong yuwan wetem Papa long Heven. !Wanem nao yu lanem long tempol bae i helpem yu kam moa olsem Papa long Heven mo Jisas Kraes.

Tingting long Hemia: ?Wanem i wan samting we yu save mekem naoia blong rere blong go long tempol?