Trabol bitwin Tu Fren

Matt i kikim wan ston taem hem i stap wokbaot i gobak long haos. Hem i no save from wanem. ?From wanem hem i harem nogud?

Hem i stap folfolem fren blong hem Josef. Be Josef i no intres, mo Matt i gobak eli long haos.

Ating mi stap mekem tingting blong mi nomo, Matt i stap tingting. Ating Joseph i gat wan rabis dei.

Long nekis dei taem Matt i go long skul, hem i luk Joseph i stap toktok long wan grup blong fren. Matt i singaotem hem mo saksakem han long hem. Joseph i lukluk i go long daereksen blong Matt, be hem i no sakem han i kambak. Hem i tanem hem i lukluk i go long ol fren blong hem.

Joseph i no luk mi, Matt i talem long hemwan.

Long taem blong klas, taem we i kam long taem blong grup wok, Matt wokbaot go long Joseph. “?Yu yu wantem yumitu blong patna? Matt i askem.

I olsem Joseph i no harem hem. “Kam Mike,” Joseph i talem long boe we i staon narasaed long hem. “Yumi go wok longwe.”

Tufala boe i wokbaot i go. Bel blong Matt i hevi. Wan samting i no stret wetem Joseph. ?Be wanem?

Matt i no save tingting long eni samting we hem i mekem long Joseph blong hem i harem nogud. Yes, samtaem tufala i stap long oposit tim taem oli stap plei baseball long brek taem. Be oltaem tufala i hae faef afta long gem. ?From i filim olsem se Joseph i stap jus blong stap long oposit tim long evri samting?

Mi mekem pat blong mi blong toktok long Joseph long brek taem, Matt i tingting.

Long brek taem, Matt i ron blong go joenem ol narafala pikinini long fil.

“!Eh Joseph!” Matt i singaot “?Mi save toktok long yu blong wan minit?”

“Gem bae i stat nao,” Joseph i talem.

“Ok bae mi kam mo plei long fil wetem yu mo bae yumitu toktok,” Matt i talem.

“Yu let tumas. I nomo gat ples long saed blong mi,” Josep i talem taem hem i ron mo go joenem tim blong hem.

Matt i wajem taem evriwan i stat blong plei. Bifo Joseph i no wantem save sapos i gat plante pipol. Evriwan i welkam.

Be Matt i no filim welkam ia long Joseph. ?From wanem Joseph i stap mekem kaen fasin ia? ?From wanem hem i no mekem hem i joen? !Matt i no mekem wan samting i rong!

“Joseph nao i stap mekem fasin we i no stret,” Matt i talem long Mama mo Papa blong hem long taem blong dina. “Iven hem i no wantem toktok long mi mo talem long mi se hem i harem nogud from wanem!”

“Hemia i had,” mama i talem.

Matt i fil se wota blong ae blong hem i hot. “I filim olsem se hem i jes stop blong kam fren blong mi, mo mi no save from wanem.”

“Mi glad from yu traem blong toktok long hem,” Papa i talem. “Maet yu traem blong talem long hem olsem wanem nao yu filim mo se yu wantem blong help.”

Matt i leftemap solda blong hem. Wei we Joseph i stap ak, Matt i no save se bae Joseph bae i wantem blong lisin long hem o no.

Mama i skwisim han blong Matt. “Bae mitufala tu i prea from yu, mo from Joseph.”

Long naet ia Matt i rere blong go silip, hem i tingting long wanem Mama mo Papa i talem. Hem i bin prea from ol fren blong hem bifo, taem we oli bin harem nogud o gat wan had taem. ?Be hemia i defren, ating? Joseph nao i stap mekem rabis fasin long hem.

?From wanem nao Mama mo Papa blong Matt i sud prea from Josef? ?Hem tu sud prea from Joseph?

Matt i nildaon long saed blong bed blong hem. “Papa long Heven, hem i had blong no kros long Joseph,” Matt i prea. “Mi save talem se hem i kros, be hem i no talem long mi wanem nao i rong.”

Matt i tingting. “Mi wantem toktok wetem hem be mi no tingse hem bae i talem long mi wanem i rong. Plis helpem hem long wanem i stap mekem hem no hapi. Mo nomata wanem i hapen, plis helpem mi stap kaen long hem.”

Taem Matt i stap prea, hem i stat blong filim pis insaed long hem. Hem i save se Papa long Heven mo Jisas Kraes Tufala i bes fren blong hem. Bae Tufala i save helpem mo lavem Joseph, nomata wanem Joseph i jusum blong mekem. Mo bae Tufala stap wetem hem iven sapos Joseph bae i no stap olsem fren blong hem.

Matt i smael. Prea from Joseph hem i wan gudfala tingting.

Ol pikja droing oli kam long Mark Robison