Doa Step Merikel

Gracie i finis kakae pan kek blong hem, putum plet blong hem long sink, mo go karem basket blong hem.

“Taem blong famli prea,” Papa i talem.

Evriwan i nildaon long living rum. Twin brata blong Gracie, George i prea. “Plis helpem mifala gat wan gud dei skul,” hem i talem. “Mo plis blesem mama se bae hem i kam Oraet. Plis blesem ol dokta blong save olsem wanem blong helpem hem.”

Mama blong Gracie i gat bren kansa. Hem i mas go long wan operesen. Ol dokta oli gat hop se bae evri samting i Oraet, be oli no save gud yet.

Afta long prea, Mama i haggem evriwan. “Bae mi go luk ol dokta tedei bakegen. Hop se yumi kasem moa ansa.”

?Olsem wanem sapos mama i ded mo mi nomo save toktok long hem bakegen? Gracie i stap askem hemwan. Hem i fraet tumas. Hem i stap tingting blong no save haggem mama blong hem o luk hem afta skul.

Long dei ia Gracie i go long klas, plei log brek taem, mo lanj olsem i nomol nomo. Hem i stap gohed blong tingbaot mama. Taem hem i filim se hem i fraet, hem i stap tingting long fevret Praemeri singsing blong hem. Ol famli i save stap tugeta blong wan taem we i no save finis tru long plan blong Papa long Heven, hem i singsing long singsing ia tru long maen blong hem.

Taem oli kasem haos afta skul, Gracie mo George i ron go insaed mo givim mama wan bigfala hag. “?Olsem wanem long apoenmen blong yu?” Gracie i askem.

“I go gud,” mama i talem. “Be yumi no save gud yet. Mi gat sam moa apoenmen nekis wik bifo mi go long operesen.”

Gracie i hapi blong luk mama blong hem. Be hem i stap wari.

Sam dei afta, doabel i ring. Taem mama i openem doa, Gracie i harem oli stap singsing.

Hem i stanap wetem mama blong hem long doastep mo lukluk i go long grup blong ol famli fren blong jos mo skul. Oli stap singsing ol Praemeri singsing. “Mifala i stap tingbaot yu mo wantem blong givim yu sam kamfot,” wan long olgeta i talem. Afta oli stat blong singsing bakegen.

George tu kam long doa. Hem i tanem hem i go long Gracie. “Yumi singsing wetem olgeta!”

Gracie mo George i karem ol kot blong tufala mo joenem olgeta aotsaed. Oli singsing strong olsem we oli save mekem:

Gracie i luk mama i waepem aot wota blong ae blong hem. Smol sista blong hem, Rosie, i hang strong long leg blong mama mo lisin.

Wan filing blong pis i kam long Gracie. Hem i stap wari long mama. Be hem i save se Jisas Kraes i lavem olgeta. Hem i wan God blong ol merikel. Mo olsem ia, Gracie i save se bae evri samting bae i Oraet.

Ol pikja droing oli kam long Bethany Stancliffe