Wan Storian wetem Emily abaot Baptaes

Mi laekem blong peint, dro,bek, mekem samting wetem han, mo danis mo singsing wetem brata mo sista blong mi. Mi laekem blong go long ranj blong apuman blong mi mo ron long ol hos.

Long wan famli haos naet, papa mo mama blong mi tufala tijim mi abaot fet, fasin blong sakem sin, baptaes, mo presen we i Tabu Spirit. Mi rere tu taem mi ridim olgeta skripja, prea, mo stap wajem ol vidio abaot Jisas Kraes. Mi rili laekem vidio abaot baptaes blong Sevya long reva Jodan. Mi laekem pat ia waet pijin i kamaot, we i ripresentem Tabu Spirit.

Papa blong mi mo mi i praktisim olsem wanem blong stanap long ples blong baptaes. Mi fraet blong go andanit long wota, be papa blong mi, i tijim mi olsem wanem blong benem ni blong mi, blokem nus, mo sarem ol ae blong mi mo foldaon slo nomo long han blong hem. Mifala praktis plante taem, long dei blong baptaes, i isi nomo blong mi mekem.

Hem i wan dei we mi no save fogetem. Sam long ol memba blong famli oli givim toktok, mo talem ol prea, mo stanap olsem ol witnes. Mi singsing long singsing ia “Taem We Mi Baptaes” wetem help blong man we i stap plei piano long Praemeri. Afta we mi baptaes, mi filim lav blong Papa long Heven blong mi mo Pikinini blong Hem Jisas Kraes, i kolosap long mi. Mi krae from mi glad.

Hem i spesel tu from hem i givim mi wan aedia blong invaetem sam long ol fren blong mi mo ol famli memba we oli no memba blong Jos blong kam long baptaes blong mi, mo oli agri. Wan long ol fren blong mi, we i bin kam long baptaes, i gohed blong stap kam yet long ol aktiviti blong Jos wetem papa mo mama blong hem.

Mi traehad blong tingbaot ol kavenan blong mi taem mi stap go long jos, tekem sakramen, mo tingbaot Sevya. Save se Hem i givim laef blong hem long mi, i mekem mi mi glad. Mi stap prea evri dei, ridim olgeta skripja, givim seves long ol narafala wan, mo traehad blong kam wan gud gel.

I go long ol fren blong mi we oli stap rere blong kasem baptaes, mi hop se yu save gro kam moa kolosap long Papa long Heven mo filim lav blong Hem we i stret evriwan!