15,100 ma Tua Atu

Ina ua atoa lo’u valu tausaga, sa iu lava ina lava lo’u matua e maua ai lau lava faitotoa o le FamilySearch! I le taimi muamua sa ou popole, ae sa aoaoina au e o’u matua ma nai o’u tei i le auala e faavasega ai igoa ma fatu ai lo’u gafa o le aiga ina ia mafai ona ou fesoasoani i o’u tuaa. Ina ua mavae lena, sa ou le toe lagonaina le popole. Sa ou lagonaina le lagolagoina ma le saunia.

Ona ou lagonaina lea o le manao ia avea ma se tagata iloilo o talafaasolopito o aiga e pei o o’u matua ma nai o’u tei. Sa ou filifilia lena mea ina ia avea ma se tasi o a’u sini mo le polokalama a Tamaiti ma le Autalavou. Ina ia ausia lenei sini, e tatau ona ou faavasegaina faamaumauga e 1,000.

Sa ou lagonaina le lofituina. Ae sa faamanatu mai e o’u matua ia te a’u o le a ou le faia uma i se aso e tasi. Nai lo lena, e tatau ona ou taulai atu i le faia o na o le tolu faamaumauga i le aso, ma a o lei atoa le tausaga o le a ou ausia la’u sini. Sa latou fai mai afai e faigata ia te a’u ona malamalama i ata, o le a latou fesoasoani mai ia te a’u.

Sa ou tatalo i le Tama Faalelagi ina ia mafai ona Ia fesoasoani mai ia te a’u e ausia la’u sini. Sa sili atu ona lelei ou lagona ina ua uma la’u tatalo.

Ou te lei fiu ma faaauau pea ona faia faasinoupu i lea aso ma lea aso. Ina ua mavae se tausaga, ae lei atoa lou iva tausaga, ua uma ona ou faavasegaina le silia ma le 1,000 faamaumauga ma ua tuuina atu i ai le tulaga o le tagata iloilo. Sa matuai o’u fiafia lava!

O le taimi nei, matou te o ma o’u matua i le Malumalu o Trujillo Peru. Ou te fesoasoani e lolomi ia kata o sauniga, oti ese, ma tuu atu i tagata taitoatasi o le aiga ina ia mafai ona latou faatinoina sauniga a o ou faatalitali i togalaau o le malumalu. E le o toe mamao ae mafai ona ou alu i totonu e fai papatisoga.

Ua 10 o’u tausaga i le taimi nei ma ua 15,100 faamaumauga ua faavasegaina! Ua ou matua fiafia lava ma fiafia e faaauau pea ona ausia a’u sini ina ia avea atili e faapei o Iesu Keriso.

Ata na tusia e Parker Nielsen