O Gaoioiga o le Sau, Mulimuli Mai ia te A’u

Sa alofa le Alii i Lana auauna o Ailama Samita ona o le “faamaoni o lona loto” (Mataupu Faavae ma Feagaiga 124:15). Sue po o le a le uiga o le upu amiosa’o ma talanoa e uiga i ai ma lou aiga. Ona tusi lea o se fatu tele i luga o se fasipepa. I totonu o le fatu, tusi ai se ata pe tusi ai se mea e mafai ona e faia ia maua ai le amiosa’o.

Ina ua foi mai Brigham Young mai lana misiona, sa poloaiina o ia e le Alii e tausi lona aiga (tagai i le Mataupu Faavae ma Feagaiga 126). Fai ma teuteu se faavaa e i ai se ata o lou aiga. E mafai faapefea ona e tausia le tasi ma le isi?

O o tatou tino e pei o tino o le Tama Faalelagi ma Iesu Keriso (tagai Mataupu Faavae ma Feagaiga 130:22). Taaalo i le taaloga lenei e faamanatu ai lou tino! Feauauai i le filifilia o se faatinoga, e pei o le osooso po o le pōpō o ulu. E kopi e isi tagata uma le faatinoga.

O Iesu Keriso e alofa ma agalelei (tagai Mataupu Faavae ma Feagaiga 133:52). Tuu igoa o tagata taitasi i totonu o se pesini. Filifili se igoa, ma ia auauna atu faalilolilo i lena tagata i le vaiaso lenei.

O Iosefa Samita o se Perofeta o le Toefuataiga (tagai Mataupu Faavae ma Feagaiga 135:3). Tusi ni ata mai lona olaga. E faapefea ona e iloa o ia o se perofeta?