Filemu i le Tatalo

“Maualuga atu, Tama!” Sa ata fiafia Maria

Sa ata tama ma toe tuu atu se tulei lapoa i le suigi. Sa nonoaina le suigi i se laau tele sa falala e ova atu i luga o le Vaitafe o Misisipi. Sa fiafia Maria i le savili i ona foliga ma le ene i totonu o lona manava a o ia suigi atu i luga o le vai ma toe foi mai.

“O a’u e sosoo!” Na fai mai ai Elisapeta.

Sa puna ese Maria mai le suigi ae tuu le avanoa mo lona uso.

Sa nonofo le aiga o Maria i Navu. Sa auai ona matua i le Ekalesia i ni nai tausaga ua mavae, ma sa la faatauina atu mea uma ina ia latou siitia atu ai iina e auai faatasi ma isi Au Paia.

O Navu o se nofoaga pisi tele. Na taunuu tagata fou i aso uma. O le fausiaina o se aai fou sa faia ai se galuega faigata, ma e oo lava i tamaiti na fesoasoani. O le fesoasoani sa lagona ai e Maria le tuputupu ae ma le taua. O nisi taimi sa ia fesoasoani ai e ala i le aumaia o le taumafataga o le aoauli a Tama a o ia galue ai i le malumalu fou.

I le Aso Sa, sa ofu e Maria lona ofu sili ona lelei ma fesoasoani i ona tuagane ma ona uso ia saunia mo le lotu. Sa potopoto tagata uma i lalo o laau e faalogologo i le Perofeta o Iosefa Samita a o aoao atu e uiga ia Iesu Keriso. Sa fiafia Maria e aoao e uiga i le auala e mafai ai ona latou toe nonofo faatasi ma le Tama Faalelagi i se aso. Sa vaaia ma faalogoina e le Perofeta le tele o mea matagofie.

E ui i lea, sa le fiafia isi tagata i le Perofeta. Sa faalogo Maria i tala e uiga i tagata sa mananao e faatiga ia te ia.

I se tasi po o le taumafanafana, sa fesoasoani ai Maria ia Tina e faamama ina ua uma le tausamaaga. Ona sau lea o Tama i le fale. Sa i ai loimata i ona mata.

“O le a le mea ua tupu?” O le fesili lea a Tinā.

“Ua fasiotia le Perofeta o Iosefa,” o le tala lea a Tamā.

Sa amata foi ona tagi tina. Sa ia fesili atu,“E mafai faapefea ona faaauau le Ekalesia e aunoa ma ia?”.

Sa lagona le faanoanoa ma le fefe o Maria. Sa ia iloa o le Perofeta o le auauna filifilia a le Atua. E mafai faapefea e le Tama Faalelagi ona faataga lenei mea e tupu?

Sa amata ona tagi o ia ma tamoe atu i fafo o le fale i le faatoaga. Ina ua tootuli ifo i ona tulivae e latalata i ni togavao, sa amata ona tatalo Maria. “Tama Faalelagi ea, o le a le mea o le a matou faia?” Ua fasiotia lo matou perofeta.” Na tafe ifo loimata i ona mata.

Ona oo mai lea o se leo malu i le mafaufau o Maria. O le a ou faatuina se isi perofeta e taitai lo’u nuu.

Sa faatumulia lona loto i se lagona mafanafana ma fiafia. Sa ia soloia ona mata ma toe tamoe atu i le fale i le vave na te mafaia ai.

“Tinā! Tamā!” Sa fai atu ai Maria. “Sa fai sa’u tatalo, ma sa tali mai le Tama Faalelagi ia te a’u.” Sa ia ta’u atu ia i laua e uiga i le leo ma le lagona toafilemu sa ia lagonaina.

A o fusiina o ia e Tina ma Tama, sa iloa e Maria o le a lelei mea uma. Sa faanoanoa pea o ia, ma sa ia iloa o le a i ai taimi faigata i luma atu. Ae o le a faaauau pea ona taialaina i latou e le Tama Faalelagi ma fesoasoani ia i latou.

Ata na tusia e Kristin Sorra