“O A’u Upu o le Talalelei,” Uo, Novema 2025, 10.
O A’u Upu o le Talalelei
Vaavaai mo upu ma fasifuaitau nei i le lomiga lenei o le Uo!
Sefuluai
O le totogiina o le sefuluai o le toe faafoi atu lea i le Tama Faalelagi e ala i le foai atu o le tasi vaesefulu (10 pasene) o le tupe tatou te maua i Lana Ekalesia. E fesoasoani le sefuluai e fausia malumalu ma ekalesia ma lagolagoina le galuega a le Ekalesia. Pe a tatou totogiina le sefuluai, e faamanuiaina i tatou e le Tama Faalelagi i le tele o auala!
Augatuaa
O o tatou tuaa o tagata i lo tatou aiga o e sa nonofo i se taimi ua leva, e pei o matua o o tatou matua matutua. O tua’ā o se vaega tāua o le talafaasolopito o o tatou aiga. E mafai ona tatou aoao e uiga ia i latou, manatua i latou, ma faia galuega faalemalumalu mo i latou ina ia mafai ona tatou faatasi e faavavau.
Faavasegaga o igoa
O lefaavasegaina o igoa o se auala e mafai ona tatou fesoasoani ai i isi ia maua o latou tua’ā! Matou te taina igoa mai faamaumauga tuai o pepa i totonu o se komepiuta ina ia mafai ai e tagata ona saili mo tagata o o latou aiga ma sue faamaumauga e uiga i o latou olaga. E fesoasoani lenei mea i talafaasolopito o aiga ma galuega faalemalumalu ina ia mafai ai ona faamauina faatasi tagata e faavavau. E oo lava i tamaiti e mafai ona fesoasoani i le faavasegaina o igoa!
Faamaturoina
E tupu se faamaturoina pe a maliu se tasi mo se mea latou te talitonu i ai. O Iosefa Samita ma lona uso o Ailama o ni maturo ona sa fasiotia i laua ona o le talitonu, ola, ma le aoaoina atu o le talalelei toefuataiina a Iesu Keriso.
O Ata na tusia e Madison Baker