Sauni e Tuputupu A’e Pea

Sa saofafai Jewel i luga o le nofoa i le sauniga faamanatuga faatasi ma ona matua ma lona tuagane. Sa ia tusia ni ata o tala o tusitusiga paia. Sa taumafai o ia e faalogologo i le failauga, ae sa lagona e lona manava e pei ua tumu i lagona popole!

O le asō o le aso muamua lea o Jewel e alu i le vasega a Tamaitai Talavou nai lo le Peraimeri. Sa lei manao o ia e tuua ana uo i le Peraimeri. Sa fiafia o ia e usu ma faitau tusitusiga paia faatasi ma i latou.

Ae sa atoa le 12 o Jewel i le tausaga lenei. Ua oo i le taimi e siitia atu ai i le polokalama a Tamaitai Talavou.

Na moeiini Jewel ma fai se tatalo le leoa. Tama Faalelagi, faamolemole fesoasoani mai ia te a’u ia maua se vasega lelei a Tamaitai Talavou.

Ina ua maea le tatalo faaiu i le sauniga faamanatuga, sa manava tele ma savali atu Jewel i le potuaoga. Sa i ai teineiti matutua iina. E toafa i latou. Sa latou talanoa ma talie.

“Talofa,” o le tala lea a Jewel.

Na latou ataata. “Malo.”

Sa sau i totonu le faiaoga ma faafeiloai Jewel. Ona ia amataina lea o le lesona.

Mo le tele o le vasega, sa lagona e Jewel le tuuatoatasi. Sa popole o ia e talanoa aua na te lei iloaina lava isi teineiti. E tatau ona i ai o ia i Tamaitai Talavou mo se taimi umi lava. Sa tai pei e faavavau! Mata o le a ia lagonaina i taimi uma le tuuatoatasi iinei?

Ona oo mai lea o se leo ititi i lona mafaufau. O le a e le i ai i Tamaitai Talavou e faavavau. Ua lava lou matua e agai ai i luma ma aoao atili e uiga i le avea ai ma se soo o Iesu Keriso.

Sa lagona e Jewel le faamafanafanaina i upu. Sa ia iloaina o le Agaga Paia o lo o fesoasoani ia te ia. E ui lava e lei toatele ni ana uo i Tamaitai Talavou, ae sa lei tuua na o ia. Sa ia te ia le Agaga Paia.

Ina ua uma le vasega, sa maua e Jewel lona aiga.

“Na faapefea mai le vasega a Tamaitai Talavou?” Sa fesili ai Tinā.

Sa opo e Jewel o Ia. “Sa lelei. Ua ou misia le Peraimeri, ma ou te lei iloaina lava teineiti. Ae sa ou lagonaina le faamafanafanaina o a’u e le Agaga Paia.”

Na ataata Tinā. “E lelei lena i le faalogo! Ma atonu o le a sili atu ona lelei i le isi taimi.”

Sa luelue atu Jewel. Sa faamoemoe o ia e sa’o Tina.

O le isi taimi na fai ai lana vasega a Tamaitai Talavou, sa toe faatalofa atu Jewel i teineiti.

“Talofa, Jewel,” o le tala lea a se tasi o i latou. “E tatau ona e nofo i ou tafatafa!”

Sa ataata Jewel ma nofo i talaane o le teineitiiti. O lona igoa o Ellie. Sa la talanoa soo a o lei amataina le lesona. Sa agalelei Ellie ma sa ia lagona ai le taliaina.

I le taimi o le lesona, sa fesili atu ai le faiaoga pe i ai se tasi na i ai se aafiaga i le Agaga Paia.

Na sii i luga le lima o Jewel. “Sa ou lagonaina le fesoasoani mai o le Agaga Paia ia te a’u ina ua ou popole e auai i Tamaitai Talavou,” o lana tala lea. “E fesoasoani le Agaga Paia ia te a’u pe a ou tuputupu a’e ma feagai ma luitau.”

Sa mafaufau Jewel i le ala na faamafanafanaina ai o ia e le Agaga Paia ina ua ia lagonaina le tuuatoatasi. Sa manaia le lagona o le faasoa atu o lona aafiaga i teineiti i Tamaitai Talavou.

Ina ua uma ona ia faasoa mai, sa fefaasoaai foi nisi o teineiti. Sa fiafia Jewel e faalogo i mea na latou fai atu.

Sa misi pea e Jewel le Peraimeri i nisi taimi. Ae ona o le Agaga Paia, sa saunia ai o ia e faaauau pea ona tuputupu a’e.

Tatala le PDF

Ata na tusia e Liz Brizzi