O le Meatball Mulimuli

Sa tatū ifo Alex i lalo o faasitepu ma se mapuea leotele.

Sa ea a’e i luga Tinā mai lana tusi. “O le a le mea ua tupu?”

“E leai se tasi e faasoa ma a’u!” Sa fai atu ai Alex. “Ou te inoino i le avea ai ma se tamaitiiti ogatotonu.” Sa maua e uso o Alex i taimi uma mea sa la mananao ai. Sa le fetaui lena mea.

“Ou te mautinoa pe a e fesili atu faalelei, o le a faasoa atu ou uso ia te oe,” o le tala lea a Tina.

Sa faanonou Alex. “Sa ou fai atu faalelei i ai!”

“Ae a pe a e taumafai e seti se taimi? O le auala lena e tofu maua ai e outou taitoatasi le aofaiga lava e tasi o le taimi e taaalo ai.”

“Sa ou setiina se taimi!” Sa fai atu ai Alex. “Ae atonu o le a ou setiina ni taimi se lua ina ia mautinoa atili.” Sa ia uu maia le isi taimi mai le fata o le umukuka ma savali atu i luga o faasitepu. O lona uso laitiiti, o Tavita, sa taalo i se taaloga i luga o le TV.

“Fai mai Tinā e tatau ona e faasoa atu,” o le tala lea a Alex. Sa ia setiina le taimi mo le lima minute. “E tatagi loa le mea lea, o le taimi o a’u .”

O le aso na sosoo ai, ina ua mananao uma Alex ma lona uso matua, o Jake, e taaalo i se taaloga, sa la faatulagaina se taimi mo le ta’i 30 minute. A o taaalo uma Tavita ma Jake i poloka, sa la faitauina tonu lava le numera o poloka mo tagata taitoatasi. Ma ina ua mananao uma Tavita ma Alex i le kuki sukalati mulimuli, sa la vaevaeina ma le faaeteete i le afa. Na iu lava ina amata ona lagona le fea o mea uma.

Ona oo ai lea i le taumafataga o le afiafi …

I lena po, o le latou meaai o le supokeli ma meatball! Sa amata e Jake ona faateleina le supokeli i luga o lana ipu a o lei mafai e Alex ona uu mai le sipuni.

“Ei, e le fea,” o le tala lea a Alex. “Ou te fiaai foi!”

Sa tuu atu e Tama lona lima i luga o lona tauau. “Alex, lea e tele le meaai mo tagata uma. Vaai, o le a ou tuuina atu ia te oe le aofaiga lava e tasi o loo i ai ia Jake.” Sa tuu e Tama ni supokeli i luga o le ipu a Alex.

Ina ua uma ona latou faamanuiaina meaai, sa amata ona aai tagata uma. Ina ua uma meaai a Alex, sa fiaai pea o ia. Sa ia autilo atu i totonu o le ulo i le ogatotonu o le laulau. Sa i ai se meatball mulimuli e tasi i le pito i luga o le faaputuga o pasta. Sa ia asuina i luga o lana ipu.

“E le fea!” Na fai atu ai Tavita. “O le mea mulimuli lena.”

Sa tusi atu ai Jake i le meatball ma lana tui. “Ou te manao foi i ai. Ta vaeluaina.”

“Vaeluaina?“ Sa fai atu ai Alex. “Mo i tatou e toatolu? Ae e laitiiti tele.”

Sa luelue atu ia Jake ma Tavita. “Ona fea ai lea.”

Sa ave e Jake le ipu a Alex ma amata ona vaevae ma le faaeteete le meatball i ni vaega se tolu. Sa tilotilo atu Alex a o laitiiti ma laitiiti le meatball.

Na ata leotele Tina. “Ua matua laiti lava na fasimea !”

Sa ata foi Tama. “E le faapea e tatau lava ona fea lelei i taimi uma,” o lana tala lea. “Atonu e mafai ona tatou taumafai ia lelei atili i le faasoaina atu o a tatou mea nai lo le vaevaeina o mea uma.”

Sa tilotilo ifo Alex i ni fasi meatball laiti. Sa fai si faavalevalea laititi. Pe na ia popole moni ea e uiga i se meatball? Atonu sa manaomia ona ia aoao e faasoa atili atu.

O le aso na sosoo ai, ina ua mananao uma Jake ma Alex e taaalo i poloka, sa la filifili loa e fausia faatasi se mea. A o i ai Tavita ma Jake i fafo, sa tuu atu e Alex ia i laua e feauauai e tietie i lana uila. Ma ina ua mananao tagata uma e taaalo i se taaloga i luga o le TELEVISE, sa lei setiina e Alex se taimi. O le faasoa atu ma le agalelei na sili atu le lagona lelei nai lo le fea atoatoa.

I lena po, ina ua mananao uma Jake ma Alex i le pani mulimuli i le taumafataga o le afiafi, sa fai atu Alex ia Jake e mafai ona ia avea le mea atoa.

“Faafetai!” sa faaivi mai le mata a Jake. “Ua e mautinoa e te le manao e vaetolu?”

Sa talie Tavita ma Alex. “E mautinoa e leai!”

Tatala le PDF

Ata na tusia e Alyssa Petersen