“Filifiliga o le Sefuluai a Logan,” Uo, Novema 2025, 8–9.
Filifiliga o le Sefuluai a Logan
“Ua e sauni e usitai i le poloaiga e totogi le sefuluai?” Sa fesili ai Tinā.
O se tala moni mai le ISA.
Ina ua lima tausaga o Logan, sa ia manatu o le sefuluai o se manatu matua’i lē fetaui!
I le taimi o le afiafi faaleaiga, sa tuu ai e Tinā le 10 tālā i luga o le laulau. “Sei o tatou faafoliga ua e maua le 10 tālā.”
Sa ataata Logan. “Ua lelei!”
“O le sefuluai e 10 pasene. O lea lā o le a e tuuina atu ai se tālā se tasi i le Ekalesia a le Alii.” Sa faase’e ese e Tinā se tālā se tasi mai le faaputuga.
Sa fa’a’ū’ū Logan. “Lafoai se tālā? Ae ou te manao e teu uma la’u tupe!”
“Atonu o le a ese ou lagona pe a e matua,” o le tala lea a Tina. “Ua fa’amanuia e le Tama Faalelagi tatou i mea uma. O le totogiina o le sefuluai o se tasi lea o auala tatou te faaali atu ai i le Atua tatou te alolofa ia te Ia ma faafetai mo Ana faamanuiaga.”
Ina ua ono tausaga o Logan, sa aoaoina o ia e ona faiaoga Peraimeri o le sefuluai e faaaoga e fausia ai malumalu. Sa fiafia Logan i malumalu. Atonu o le totogiina o le sefuluai o se manatu lelei lea mo nisi tagata. Ae le mo ia.
Ina ua fitu tausaga o Logan, sa ia matauina na ataata tagata ina ua latou tuuina atu a latou teutusi o le sefuluai i le epikopo. Mata e mafai e le foai atu o lau tupe ona faafiafiaina moni ai oe?
Ina ua valu ona tausaga, sa fesili atu Tinā ia te ia, “Logan, aisea na e filifili ai e papatiso?”
Sa faigofie le fesili lena! “Ina ia tausia poloaiga ma mulimuli ia Iesu Keriso,” o le tala lea a Logan.
“O lea la ua e sauni e usitai i le poloaiga e totogi le sefuluai?” Sa fesili ai Tinā. “E pule lava oe.”
Sa faanoanoa lona loto. Sa le faigofie le fesili lena. Sa ia lei manao lava e foai atu lana tupe. Ae sa ia fia manao ia tausia poloaiga. Sa mafaufau Logan i malumalu ma tagata ataata o e na totogi sefuluai. Ona ia manava loloa lea ma fai mai, “Ioe.”
“O se filifiliga lelei lena.” Na fai atu ai Tinā.
Na lagona e Logan si fiafia teisi. “Ou te iloa o le tausia o poloaiga e sili atu ona tāua nai lo le teuina o a’u tupe uma.”
I le Aso Sa, ina ua ia tuuina atu lana teutusi muamua o le sefuluai i le epikopo, sa iloa e Logan sa ataata o ia. Sa ia lagona le fiafia! Sa lei malamalama lava o ia i mea uma e uiga i le sefuluai. Ae sa alofa o ia i le Atua, ma sa ia iloa o le a faamanuiaina o ia e le Atua mo le usiusitai i poloaiga.
Ata na tusia e Shawna J. C. Tenney