“O Le Api Talaaga o le Papatisoga a Maria,” Uo, Oketopa 2025, 4–5.
O Le Api Talaaga o le Papatisoga a Maria
“O le a le feagaiga?”
O se tala moni mai Atenitina.
“O loo ou va’ava’ai atu i se tagata laititi lea o le a faia lona aso fanau i se taimi lata mai! Faamata o ai lena tagata?” Sa fesili atu ai Mama.
“O a’u!” Na fai mai ai Maria, ma osooso i luga ma lalo. O le vaiaso na sosoo ai o le a atoa ai lona valu tausaga.
Sa luelue atu le ulu o Mama. “Ma o le a avea ma se aso fanau faapitoa. E te iloa pe aisea?”
“Ona o le a papatisoina ai a’u!”
“Ioe! E i ai se ma meaalofa faapitoa ma Papa e fesoasoani ia te oe e saunia ai mo lenei laasaga taua.”
“O se meaalofa? Ae e le’i oo i lo’u aso fanau,” na faiatu ai Maria.
“O se meaalofa faapitoa o le a fesoasoani ia te oe e manatua ai le feagaiga o le a e osia ma le Tama Faalelagi. E mafai ona e tatalaina pe a uma le ‘aiga o le afiafi.“
Sa mafaufau pea Maria e uiga i le upu feagaiga. Sa le mafai ona ia faatali mo le toe foi mai o Papa i le fale. Sa ia ofo atu e seti le laulau mo le taumafataga o le afiafi ma lagona le mafanafana o lona loto. O le taumafataga o le afiafi na foliga mai e sili atu ona tofolelei i lena po.
Mulimuli ane, sa nofo o ia i luga o le nofoa i le va o ona matua.
‟O le a sou lagona e uiga i le papatisoga?” Sa fesili atu ai Papa.
“Ua ou fiafia lava!” Sa galue malosi Maria e sauniuni mo lona papatisoga. Sa amata ona ia faitauina le Tusi a Mamona. Sa ia faia foi se pepa lautele o i ai se savali e fesoasoani ai ia te ia ia manatua e tatalo i po uma.
“Ua lelei tele lena! E i ai ni au fesili?”
“Ioe. O le a le feagaiga?”
“O se fesili lelei lena.” na fai atu ai Mama. “O se feagaiga o se folafolaga e faia ma le Atua. Pe a e papatiso, ua e folafola atu ua e naunau e tauave i ou luga le suafa o Iesu Keriso, o le a e tausia poloaiga a le Atua, ma o le a e auauna atu ia te Ia i lou olaga atoa.”
“E pei lava lena mea o le tatalo o le faamanatuga,” o le tala lea a Maria.
“E sa’o oe,” o le tala lea a Papa. “Ua folafola mai foi e lo tatou Tama Faalelagi o le a faatasi le Agaga Paia ma oe, e taialaina ma faamalosi’au ia te oe.”
“Ia ma o lau meaalofa la lea.” Sa tu’u atu e Mama ia Maria se meaalofa iila ua afifiina.
Sa tatalaina e Maria ma maua ai se api talaaga lanu piniki matagofie ma se peni. “Faafetai! Matuai ou fiafia lava i ai!”
“O lenei api talaaga e mo oe e tusi ai lagona ma mafaufauga e te maua mai le Agaga Paia.”
“O le papatisoga o se filifiliga tele,” o le tala lea a Papa. “E mafai ona e tatalo ma ole atu i le Atua, e uiga i ai.”
O lena po, sa tootuli ai Maria i tafatafa o lona moega. Sa tatalo o ia, “Le Tama Faalelagi e, se mea sa’o ea mo a’u le papatisoina?” Sa ia faatali, ma faalogologo. Sa faatumulia lona mafaufau i se “ioe” manino, ma sa faatumulia lona loto i le olioli.
Sa ia toso mai i fafo lana api talaaga ma tusi e uiga i mea sa ia lagonaina. O le taeao na sosoo ai, sa ia ta’u atu ai i ona matua e uiga i lana tali. Sa ia iloa o le papatisoina o le mea sa’o lea e fai.
Mulimuli ane ua o’o i lona aso fanau, ma o le a papatisoina Maria. Sa laei o ia ma Papa i ofu papae. Sa fusi o ia e Mama. “O le a e lagonaina le mafanafana i lou loto.”
Sa malulu le vai, ae sa lagona e Maria le mamā ma le le gavia—ma le mafanafana i totonu.
O lena po, sa susu’e ai e Maria lana api talaaga i se itulau avanoa ma amata ona tusitusi.
“Ina ua fai mai Papa, ‘Talia le Agaga Paia,’ sa matua ou lagonaina moni lava,” sa ia tusia ai.
Sa manao o ia e manatua pea le aso o lona papatisoga. Sa saunia o ia e tausia lana feagaiga, ma le iloaina o le a i ai pea iina le Agaga Paia e fesoasoani ia te ia.
Ata na tusia e Zoë Bennett