“O Se Nofoaga Filemu,” Uo, Oketopa 2025, 36–37.

O Se Nofoaga Filemu

Saunia e Alissa Holyoak

Sa matua popole lava Kevin! Sa foliga mai e lē o se aso lelei e alu ai i le malumalu.

O se tala moni mai le ISA.

Sa faatalofa atu Kevin i le epikopo ma savali ese mai le ofisa. Sa ia tilotilo ifo i lalo i le tamai kata sa ia umia. O lana lava pepa faataga o le malumalu!

Sa faatalitali Tamā ia te ia i le faapaologa. “O afea e mafai ona ta o ai i le malumalu?” Na fesili atu ai Kevin ia te ia.

Sa ataata Tama. “E mafai ona ta setiina se taimi faatulagaina i le taimi lava ta te taunuu ai i le fale.”

Sa faia e Kevin ma Tamā se taimi faatulagaina e faia ai papatisoga mo e ua maliliu. Ae ina ua oo mai le aso o le taimi faatulagaina, sa ma’i Kevin, o lea na la toe faatulagaina ai. Ona tatau lea ona la toe faatulagaina foi lea ona sa i ai se malaga faigaluega faafuasei a Tamā.

Sa amata ona mafaufau Kevin pe o le a i ai se taimi e alu ai o ia i le malumalu.

Ina ua oo mai le aso o le taimi faatulagaina lona tolu , ua saunia Kevin! Sa la fuafua ma Tamā e o atu i le malumalu i le taimi lava e uma ai le taumafataga o le afiafi.

Sa ataata Kevin a o sauni o ia mo le aoga. Ae na mou atu lona lagona lelei ina ua faasilasila mai e lona faiaoga o le matematika se suega laititi. E le’i sologa lelei le su’ega. E faapena foi i itula na totoe o le aso aoga. Ma e o’o ane i le taimi na piki ai o ia e Tinā, sa tiga lona ulu.

“E te manatua o loo e vaaia mo sina taimi vaega uma i le fale ao ou atu i se feau faavave?” Sa talosaga atu ai Tinā.

Na faataupupula atu Kevin ma lona le mautinoa. Na te le’i manatuaina.

O le taimi lava na alu ese ai Tinā, na amata ona finau uso o Kevin. Ina ua taumafai Kevin e fesoasoani ia i laua e foia le faafitauli, sa feita i laua ia te ia. Mata e mafai ona sili atu le leaga o lenei aso?

Ioe! O le taimi lava lena, na sasa’a ai e lona tuafafine laitiiti le susu i luga o le fola o le umukuka. A o ia solo faamamaina, sa tātā vae lava le fatu o Kevin, ma sa fufusi ona maso.

Na toe foi mai Tinā a o ia tuu ese le solo. “Na toe masa’a foi se mea i lou tuafafine?”

Na lue atu le ulu o Kevin ma faamimigi ona tauau, a o ia taumafai e malolo. “O se aso leaga.”

“O le a le mea ua tupu?” O le fesili lea a Tina.

“Ua tele lava le lē fiafia ma le atuatuvale. E foliga mai e le o se aso lelei e alu ai i le malumalu.”

“E mafai ona tatou filifilia se isi aso,” o le tala lea a Tinā

O le manatu o le toe faatulagaina foi o le taimi, na atili ai ona leaga le lagona o Kevin. “Leai,” na ia fai mai ai. “Ou te fia alu. Pau lava le mea o lou le lagona tele o se filemu. “

“O le a talia oe e le Tama Faalelagi i Lona maota e tusa lava pe e te lagonaina le filemu pe leai,” o le tala lea a Tinā. “Ma o Iesu Keriso o le Aloalii o le Filemu. O le tele o taimi e mafai ona e maua ai le filemu i le malumalu e tusa lava pe sa i ai sou aso atuatuvale.”

Sa mapuea Kevin. “O le a taumafai atu.”

I le taimi o le taumafataga o le afiafi ma le tietiega atu i le malumalu, sa ia mafaufau pea i mea leaga uma na tutupu i lena aso. Sa ia lagonaina pea le popole ina ua la taunuu atu ma Tamā i le malumalu. Ae o le taimi lava na savali atu ai Kevin i totonu o le faitotoa, sa ia malolo teisi.

Sa mamā ma filemu le malumalu i totonu. Sa ofu papa’e tagata uma ma tautala lemu. A o ia sui i se suti pa’epa’e i totonu o le potu e fai ai lavalava, na mātauina e Kevin ua telegese lana minoi ma tautala lemu foi. Ina ua oo i lona taimi e fai ai papatisoga, sa sili atu ona lelei ona lagona.

Sa papatisoina e Tamā Kevin mo tagata e toafa o e ua maliliu. Na amata ona tupu le filemu ma le fiafia i totonu o Kevin. E le gata ona sa i ai o ia i se nofoaga filemu, ae faapea foi ona sa ia fesoasoani i tagata e osia feagaiga ma le Atua.

A o tietie atu i le fale, na iloa ai e Kevin e le o toe popole o ia. Ma sa toe ataata o ia! E na o le tasi lava lana fesili mo Tamā.

“O afea e mafai ai ona ou toe alu atu ai i le malumalu?”

Sa ata Tamā. “E le o toe mamao.”