O Se Talanoaga ma Azahara e uiga i le Malumalu

Ta’u mai ia i matou e uiga ia te oe.

E i ai lo’u tuagane matua ma se uso matua. O a’u mea e fiafia i ai o ni siva tatufeni (rhythmic gymnastics) ma le taina o le piano, ma o la’u lanu e sili ona ou fiafia i ai o le lanu viole.

O le malumalu ua avea ma se faamanuiaga sili ia te a’u, e oo lava i le taimi a o lei lava lo’u matua e alu ai i totonu. I le na o le tilotilo atu i ai mai fafo, sa mafai ai ona ou lagonaina le alofa o le Tama Faalelagi.

E tāua foi le malumalu i lo’u aiga. Fai mai o’u matua pe a la i ai i le malumalu, la te lagona e pei i ai i la’ua i le fale. Faimai i la’ua o se nofoaga e mafai ona la lagona ai le latalata atu i tagata o aiga ua maliliu. O se nofoaga foi lea e mafai ona tatou fesoasoani ai e faapotopoto Isaraelu.

Na faapefea ona e saunia e te alu atu i le malumalu

Sa ou saunia e ala i le taumafai e mulimuli i le faataitaiga a Iesu Keriso. Sa ou faitauina tusitusiga paia, tatalo, ma alu i le lotu. Ou te le o 100 pasene atoatoa, ae faatasi ai ma le fesoasoani a le Tama Faalelagi, e mafai ai ona ou agavaa.

O le alu i le malumalu mo le taimi muamua o se tasi lea o mea sili ona matagofie ua ou faia i lo’u olaga. Sa ou lagonaina le alofa o le Tama Faalelagi i taimi uma. Sa ou o faatasi ma lo’u aiga ma nisi o le autalavou mai la’u uarota. Sa papatisoina au e lo’u tama mo nisi o o’u tua’a. Sa ou fiafia e iloa o loo ou fesoasoani ia i latou i se mea e le mafai ona latou faia e i latou lava.

O le a se fautuaga e te tuuina atu i isi tamaiti o e o loo sauniuni mo le malumalu?

O se tasi o fautuaga ou te tuuina atu o le faitau lea o tusitusiga paia. Pe a tatou a’oa’o e uiga ia Iesu Keriso ma avea ma soo sili atu ona lelei, o le a sili atu ona tatou fiafia e ulu atu i le malumalu.

Pe a e faia papatisoga i le malumalu mo le taimi muamua, ia fiafia i sekone uma! Tusi e uiga i lou aafiaga i se api talaaga ina ia lē galo lava ia te oe.