“Fesili a Justina,” Uo, Oketopa 2025, 16–18.

Fesili a Justina

Saunia e Justina McCandless

Ua tete’a matua o Justina. Pe o faaauau pea ona avea i latou o se aiga e faavavau?

O se tala moni mai le ISA.

“Ua tatou oo ea?” O le fesili lea a Justina.

“Toeitiiti lava,” o le tala lea a Tināmatua. Na liliu le taavale i le tulimanu, ma o iina sa i ai! Sa tu maualuga le malumalu i luga o le mauga. Sa ese le manaia!

Sa i ai iinei Justina ma lona aiga mo le faapaiaga o le malumalu. Fai mai Tinā o se fonotaga tāua lea e faia ai e se Aposetolo se tatalo faapitoa i totonu o le malumalu. Ona saunia lea o le malumalu mo tagata o le Ekalesia e faatino ai sauniga i totonu. “O faapaiaga o malumalu e faasalalauina ina ia mafai e tagata o le Ekalesia ona maimoa i ai mai o latou falelotu,” o le tala lea a Tinā. “Ae ua laki tatou lea ua mafai ona auai i le faapaiaga i totonu o le malumalu.”

O ni tamaitai e toalua ma se teineitiiti o loo faia ni pepa e ufiufi ai seevae i fafo atu o le malumalu

I fafo atu o faitotoa o le malumalu, sa tuu atu ia i latou ni ufiufi palasitika papae e tuu i o latou seevae. Na manatu Justina e foliga valea ea na mea. “Aisea e tatau ai ona tatou faia nei mea?” sa ia fesili atu ai ia Tināmatua.

“Latou te puipuia kapeta fou,” o le musumusu atu lea a Tināmatua. “Manatua, e tatau ona tatou musumusu i totonu o le malumalu, a ea? Tatou te mananao e faaaloalo i le maota o le Alii.”

A o latou savavali atu i totonu o le malumalu, sa tilotilo atu Justina i luga o taualuga maualuluga. Sa matua filemu lava o lea sa manao ai o ia e savali i luga o ona tamatamaivae ma taofiofi lana manava. Sa faate’ia o ia ina ua amata ona latou savavali i luga o se faasitepu faataamilo. O faasitepu e foliga mai e faaauau pea e faavavau.

Mulimuli ane, sa latou taunuu atu i le potu lea o le a matamata ai lona aiga i le faapaiaga. “E ta’ua lenei vaega o se potu o faamauga,” o le tala lemu lea a Tināmatua. “E te iloa mea e faia ai iinei?”

Sa lulu le ulu o Justina e leai.

“O iinei e faamauina faatasi ai aiga e faavavau. O lona uiga e mafai ona latou nonofo faatasi i le lagi pe a latou feoti. Vaai atu i fa’ata.” Sa tusi atu Tināmatua i fa’ata i itu uma e lua o le potu. “Vaai i le mea e tupu pe a e vaai i lou ataata?”

Sa tilotilo atu Justina i se tasi o fa’ata ma vaaia ai lona ata o loo alu ai pea lava pea.

“Oka,” o le tala lea a Justina, ao ia faamautinoa e musumusu atu. “E faaauau pea e faavavau.”

Ina ua amata le faapaiaga, sa mafaufau Justina i lona aiga. O ona matua ua tatala le la faaipoipoga. Ma sa ia iloaina e lei faamauina i latou i le malumalu.

Sa tilotilo atu o ia i lona tinā ma nai ona tei o nonofo i ona tafatafa. Pe o le a ia faatasi ma i latou i le lagi? Ae faapefea pe afai e le mafai ona ou faatasi ma lo’u aiga e faavavau ona e le o faamauina i matou? O lena manatu na mafua ai ona ia lagona le fefe ma le popole.

Sa punou latalata atu Justina ia Tināmatua ma fesili atu, “O le a le mea e tupu pe afai e le faamauina oe i lou aiga?”

Sa mafaufau Tināmatua mo se minute. Ona ia fai mai lea, “Ou te le iloa, pele. Ae ou te iloa e alofa le Atua ia i tatou ma e finagalo ia tatou fiafia.”

Sa mafaufau Justina i lena mea a o ia faalogologo atu i le failauga na sosoo ai. E lei umi ae toeitiiti uma le faapaiaga. Ua oo i le taimi e usu ai le pese “O Le Agaga o le Atua.”

A o pese Justina, sa ia lagonaina se lagona mafanafana i lona loto. Sa ia iloaina sa ta’u atu e le Agaga Paia ia te ia o le a lelei mea uma. Sa ia lagonaina e pei ua tuputupu a’e lona faatuatua.

Tamaitai ma se teineitiiti o loo feopoopota’i

Ina ua uma le pese, sa fusi atu e Justina ia Tināmatua. Sa lei ia te ia tali uma, ae sa ia te ia le faatuatua e alofa tele le Atua ia te ia ma lona aiga. Sa ia iloa e mafai ona ia faatuatuaina o Ia.