Faaitaulii le Taimi o Tusiga Ata

“Ua o’o i le taimi mo la tatou lesona tusi ata!” Fai mai Madam Nadirah. Sa ia tausa’e mai se pusa tele i le pito i luma o le potuaoga. O le atigipusa sa i ai fagu vali ma pulumu vali na pipii mai ai.

Sa ata Atamu. Sa fiafia o ia i le taimi o le tusiga ata! Latou te galulue i taimi uma i vaega i a latou galuega faatino. Atonu o le taimi lenei o le a ia faatasi ai ma se tasi o ana uo.

Sa tusi atu Madam Nadirah i le laulau muamua. “O le vaega muamua o Enzo, Ivan, Mei Ling, ma Atamu.”

Sa tu Atamu ma alu atu e saofa’i i le laulau. Na te le’i iloaina se tasi i lana vaega. Ae sa lelei o ia i le faia o ni uo. Atonu o le a avea i latou ma uo fou!

O le taimi lava na maua ai e tagata uma a latou vaega, na amata ona tufatufaina atu ai loa e Madam Nadirah sapalai. “O lau lu’i o le faaaogaina lea o nei mea e fai ai ata,” o lana tala lea.

Sa ia tuu ni ipu se tolu i luga o laulau taitasi. Na punou atu Atamu i luma e tilotilo i totonu o a latou ipu. O le tasi ipu sa i ai ni atigi nati, o le isi sa i ai ni laau laupapa, ma o le ipu mulimuli sa i ai ni pulu felanulanua’i.

Sa faau’ū Atamu. Na te le iloa le mea e fai i nei mea.

“E na o le tasi lava le taimi e fai ai se poloketi se tasi,” o le tala lea a Madam Nadirah. “O lea ia galulue faatasi e filifili po o le a le mea o le a e faia.”

Na faatumulia le potu i talanoaga leotele a o amata ona fuafuaina e vaega a latou galuega faatino.

“O le a se mea e tatau ona tatou faia?” Na fesili Atamu i lana vaega.

Na tusi atu Mei Ling i laau. “E mautinoa lava o se laau. O fasi laau e mafai ona avea ma ogalaau ma lala, ma pa’u/atigi pinati e mafai ona avea ma laulaau.”

“O le a le mea e tatau ona tatou faaaogaina ai fasi pulu?” O le fesili lea a Enzo.

“O nisi o pulu e lanumeamata,” o le tala lea a Atamu. “Atonu e mafai ona tatou faaaogaina mo laula’au.”

Na lūlū le ulu o Ivan. “Leai, e tatau ona tatou faia se fale. O pa’u pinati e mo le taualuga. O fasi laau e mo puipui, ma o pulu e mo faamalama.” Sa ia uuina ni atigi ma ni fasi laau e faaali atu ia i latou.

Na fao ese mai e Mei Ling le ipu mulimuli ae le’i mafai e Ivan ona maua ia pulu. “Ae o lea ou te manao e fai se laau!”

“Ia, o lea ou te manao e fai se fale!” Na taumafai Ivan e toe aumai le ipu mai ia Mei Ling.

Sa tilotilo atu Atamu i ana uo fou. Sa le’i manao o ia e misa i latou. Ae o lea na faatagaina i latou e faia se poloketi e tasi. E le mafai ona latou faia se laau ma se fale.

Ona oso a’e lea o se manatu o Atamu. Atonu sa i ai se auala e mafai ai ona latou faia mea uma e lua. Ae e a pe a tatou faia se fale i totonu o se laau?”

Na taofi e Mei Ling ma Ivan le misa i luga o le ipu pulu ma tilotilo atu ia Atamu.

“E pei o se fale laau?” O le fesili lea a Mei Ling.

“Ioe!”

Na toe tuu e Mei Ling le ipu i luga o le laulau. “Ua lelei.”

Na luelue atu foi le ulu o Ivan. “Tatou faia loa!”

Na aumai e Atamu se pepa ma se kelū mai le pusa o mea tusi/valivali ata. Na filifilia e Enzo lanu o vali. Ona amata lea ona latou fausiaina la latou fale laau. I le taimi muamua, na galulue Mei Ling ma Ivan i vaega lea na mana’o ai lava le tagata ia. Ae e le’i umi ae latou galulue faatasi uma ma talie ina ua valia uma o latou tamatamailima.

Na faasolosolomalie lava ona liua a latou laau, atigi, ma pulu i se fale laau maualuga ma felanulanua’i. Na faaopoopo e Atamu se atigi/pa’u pinati i le taualuga.

“Ou te le’i iloa o le faia o se fale laau o le a matua malie lava,” o le tala lea a Ivan. Sa ia faapipii se isi pulu i le laau.

“Ioe, o se manatu lelei tele lenei!” Sa fai mai Mei Ling.

Sa ata Atamu. Sa malie le galulue faatasi. Sa faamoemoe o ia e mafai ona ia toe galulue ma ana uo fou mo le isi lesona i le vasega tusi ata!

Tatala le PDF

O ata na tusia e Corey Egbert