Kakeememej ko an Kweilo̧k eo

Jipan̄ jān Lan̄

Būreejtōn Oaks ekar kōnono kōn men ko Jemedwōj Ilan̄ ej litok n̄an kōj n̄an jipan̄ kōj kāālet jim̧we eo. Jipan̄ eo ad ekajoortata ej ad Rilo̧mo̧o̧r, Jisōs Kraist. Kōnke E, jemaron̄ bōk jeorļo̧k bōd im bar juon alen mour ālkin ad mej. Jemedwōj Ilan̄ ej barāinwōt letok n̄an kōj kien ko, kain̄i ko im bujen ko, im Jetōb Kwojarjar n̄an jipan̄ im tōl kōj.

Jin̄aiki juon wāween Jemedwōj Ilan̄ ej jipan̄ eok!

Epaake Rilo̧mo̧o̧r

Būreejtōn Eyring ekar ba bwe ke ekar dik, kweilo̧k in kwojkwoj eo ekar kōm̧m̧an ilo jota. Juon bon̄ emarok im m̧ōļo, ekar en̄jake juon meram im māņāāņ ilo m̧ōnjar eo ke ekar bōk kwojkwoj eo. Ke rekar al naan kein “O Rilo̧mo̧o̧r, pād ippā bon̄in,” ekar en̄jake iakwe im epaake eo an Rilo̧mo̧o̧r kōn Jetōb Kwojarjar eo.

Jin̄aiki juon wāween komaron̄ eddōkļo̧k n̄an epaakeļo̧k Jisōs Kraist.

Tōmak, M̧ōttan Wōt, Erom

Sister Wright ekar kwaļo̧k ewi wāween ad maron̄ erom rikaļoor an Jisōs Kraist to̧o̧n wōt ad mour. Jemaron̄ tōmak ilo E jān ekkatak kōn E im en̄jake Jetōb Kwojarjar eo. Jemaron̄ m̧ōttan ļo̧k wōt Jisōs Kraist im Kabun̄ eo An jān kōm̧m̧an im kōjparok bujen ko. Im jemaron̄ erom āinwōt E jān ļoore waanjon̄ak eo An.

Juon Menin Letok Aorōk

Elder Kearon ekar kōnono kōn m̧anit in leļo̧k mennin leļo̧k ko ipeļaakin laļ in. Jej leļo̧k mennin leļo̧k ko jej liļo̧k im būki. Aaet penguin ko rej leļo̧k dōkā rabwōlbwōl n̄an doon āinwōt juon mennin leļo̧k ko! Juon mennin leļo̧k eaorōk jān Jemādwōj Ilan̄ ej jeļā bwe jej lukkuun leddik im ļaddik ro raorōk Nejin. N̄e jej lukkuun bōk mennin leļo̧k in, jemaron̄ jeļā wōn kōj im ewi wāween ad lukkuun iakwe.

Juon Mejatoto Ebun̄bun̄

Elder Tai im baam̧le eo an rekar kāām juon iien ium̧win iju ko. Ajri ro nejin rekar kajjitōk etke rekar jab maron̄ loe iju ko ilo kapijuknen eo aer. Ekar kōmeļeļeiki bwe ettonoon in mejatoto ekar kōm̧m̧an an pen n̄an loe iju ko. Kein kōm̧ad ko im kapo ko maron̄ kōdo̧ in pijen loļo̧kjeņ eo ad ilo jetōb. Ak kōn tōmak, jemaron̄ jeļā bwe Jemedwōj Ilan̄ im Jisōs Kraist rej aolep iien pād ijeņ.