5 ka Paagi sa Paghimong Espesyal sa Sakramento

Matag semana sa simbahan, kita makaambit sa sakramento.

Kini usa ka espesyal nga panahon sa paghinumdom ni Jesukristo ug sa mga pakigsaad nga atong gihimo sa bunyag.

Aniay lima ka paagi nga kamo makaandam alang sa sakramento.

1. Pag-andam alang sa pagsimba! Ipahimutang daan ang inyong pang-Dominggo nga mga sinina sa gabii sa dili pa mosimba. Makatabang kini kaninyo nga mobati nga wala nagdali-dali. Paningkamoti nga moabot sa Simbahan sa tukmang oras aron makapaminaw kamo sa musika ug makahunahuna mahitungod ni Jesukristo. Kon mangandam kamo alang sa sakramento, andam kamo nga mobati sa Iyang gugma.

   

2. Paghunahuna mahitungod sa inyong semana. Unsay nahitabo sa milabayng semana? Nagbuhat ba kamo og bisan unsang butang nga mabination? Aduna bay mga butang nga mibati kamo nga mapasigarbohon? Aduna bay bisan unsang butang nga mas maayo ninyong mahimo sa sunod semana? Mahimo ninyong hunahunaon kini nga mga butang samtang mangandam kamo alang sa simbahan ug atol sa sakramento.

   

3. Hunahunaa kon unsa ang ganahan ninyong buhaton sa lahi nga paagi. Tan-awa ang usa ka hulagway sa Manluluwas diha sa Higala. Magtutok Kaniya ug mohinumdom nga tungod Kaniya, kita makahinulsol ug makasulay pag-usab kon makahimo kita og dili maayo nga pagpili. Siya ug ang Langitnong Amahan nahigugma kaninyo!

   

4. Mag-ampo sa Langitnong Amahan. Ang sakramento usa ka espesyal nga panahon sa paghunahuna mahitungod sa kinabuhi ni Jesukristo ug sa Iyang Pag-ula. Gamita kining hilom nga panahon sa paglitok og usa ka espesyal nga pag-ampo ngadto sa Langitnong Amahan. Sultihi Siya sa tanan nga anaa sa inyong hunahuna, ug Siya makahatag kaninyo og kalinaw (tan-awa sa Mga Taga-Filipos 4:6–7).

   

5. Basaha ang mga pag-ampo sa sakramento. Ang mga pag-ampo sa sakramento alang sa pan ug sa tubig anaa sa Doktrina ug mga Pakigsaad 20:77, 79. Basaha kini nga mga pag-ampo sa dili pa o atol sa miting. Kon nagkinahanglan kamo og tabang, hangyoa ang usa ka hamtong sa pagbasa niini uban kaninyo. Bantayi ang tanang higayon nga si Jesukristo gihisgotan diha sa mga pag-ampo.

   

Mga paghulagway pinaagi ni Jarom Vogel