Mga Tabanog sa Pasko sa Pagkabanhaw

Gihigtan ni Colin ang duha ka taas nga piraso sa kahoy aron mahimo ang iyang tabanog. Dayon gihugot niya sa pagbugkos ang gawas sa tabanog aron molig-on kini. Karon higayon na para idugang ang mabulokon nga papel.

Gitudlo ni Tiyo Ladd ang iyang kaugalingon nga tabanog. “Husto ba ang pagkabuhat nako niini?”

“Oo. Karon biraha og hugot ang tugot,” miingon si Colin.

“Ug pagpili og pipila ka panapton alang sa ikog,” miingon si Alec, manghod nga lalaki ni Colin. Mitudlo siya ngadto sa mga gilis sa panapton diha sa lamesa. “Kana makatabang niini nga molupad.”

Si Colin ug ang iyang pamilya naghimo og mga tabanog alang sa Biyernes Santo. Ang Biyernes Santo usa ka dakong holiday sa Bermuda. Mao kini ang Biyernes sa dili pa ang Pasko sa Pagkabanhaw. Ang tanan nagsaulog pinaagi sa pag-adto sa baybayon aron magpalupad sa ilang mga tabanog. Si Tiyo Ladd mibisita sa pamilya ni Colin. Wala pa siya sukad makahimo og usa ka tabanog kaniadto.

“Nganong magpalupad man kamo og tabanog sa Biyernes Santo?” Nangutana si Tiyo Ladd. Mipili siya sa pula ug asul nga papel para sa iyang tabanog.

“Ang mga tabanog nga naglupad sa kahanginan mopahinumdom kanato nga si Jesukristo nabanhaw,” miingon si Colin. “Miadto siya aron makig-uban og usab sa Langitnong Amahan. Mao nga kitang tanan mabanhaw ugma damlag.”

Mitando si Alec. “Ang tanan sa Bermuda nagpalupad og mga tabanog aron sa pagsaulog.”

“Unsa ang imong paborito nga bahin?” Nangutana si Tiyo Ladd.

Gipili ni Colin ang pipila ka kolor nga papel. “Ganahan ko nga kini makadala kanato nga mas mapaduol ngadto sa Dios. Ug kita makagahin og panahon uban sa pamilya ug mga higala.”

“Ganahan ko nga daghang mga tawo ang magdungan sa pagsaulog,” miingon si Alec.

Sa Biyernes Santo, si Colin ug ang iyang pamilya miadto sa baybayon. Gikuha nila ang ilang mga tabanog, mga gibola-bolang karne sa isda, ug init nga pan de leche.

Duna nay daghang tawo sa baybayon. Ang mabulokon nga mga tabanog mipuno sa kalangitan. Ang hangin mihuyop sa buhok sa tanan, ug ang hayag nga asul nga langit miparehas sa kolor sa dagat. Usa kadto ka sakto kaayo nga adlaw sa pagpalupad og tabanog!

Naglingkod sila sa baybayon aron mangaon. Init pa ang bola-bolang karne sa isda, ug ang pan de leche humok. Si Colin ug si Allec mikamay sa ilang mga higala nga miagi.

Dayon nanglakaw sila uban ni Tiyo Ladd ngadto sa baybayon. Gigunitan ni Colin pag-ayo ang iyang tabanog. Kinahanglan niyang modagan ug mosulay sa pipila ka higayon sa dili pa mosaka ang tabanog sa hangin ug tugutan kini diha sa kahanginan. Gitan-aw niya ang iyang dekolor nga tabanog nga nagkiay-kiay sa huyuhoy sa hangin.

“Nalipay ko nga si Jesus nabuhi pag-usab,” miingon si Alec.

Si Colin mitutok sa iyang tabanog ug mipahiyom. “Ako sab.”

Mga paghulagway pinaagi ni Tatsiana Burgaud