“Isugilon ang Istorya sa Pasko sa Pagkabanhaw,” Higala, Abril 2025, 24–25.

Isugilon ang Istorya sa Pasko sa Pagkabanhaw

Ni Lucy Stevenson Ewell

Ipahigayon kini nga programa sa Pasko sa Pagkabanhaw uban sa inyong pamilya! Pagpili og mga tigbasa alang sa matag bahin. Dayon pundoka kini o ang susama nga mga butang aron ipataas alang sa matag bahin sa istorya.

Sa semana sa wala pa mamatay si Jesukristo, misulod siya sa Jerusalem sakay ang usa ka asno. Ang mga tawo miwara-wara og mga lukay ug misinggit og “Hosanna!” (Tan-awa sa Marcos 11:8–9.) Ang pulong nga hosanna nagpasabot og “luwasa kami karon.”
Pipila ka adlaw ang milabay, ang Manluluwas mihatag sa sakramento ngadto sa Iyang Apostoles. Gikuha niya ang pan ug gipanalanginan kini ug gipikas-pikas kini ngadto sa mga piraso. Gipasa usab Niya palibot ang usa ka kopa nga ilang imnan. Miingon Siya, “Buhata ninyo kini sa paghandom kanako” (Lucas 22:19).
Si Jesus miadto sa Tanaman sa Getsemani. Nag-antos Siya alang sa tanan natong mga sala, mga kasakit, ug mga kasubo. Siya nag-ampo, “Amahan, kon buot ka, kuhaa kining kopa gikan kanako; hinoon, dili ang akong pagbuot maoy matuman kondili ang imo” (Lucas 22:42).
Miabot ang mga sundalo sa pagkuha ni Jesus. Sila “[misul-ob kaniya og] kupo nga mapula” ug usa ka “purongpurong nga sampinit” (Mateo 27:28, 29). Sila mibugalbugal ug mipasakit Kaniya.
Sila mibutang og mga lansang sa mga kamot ug mga tiil sa Ginoo. Diha sa krus, si Jesus miingon, “Amahan, pasayloa sila, kay wala sila makasabot sa ilang ginabuhat” (Lucas 23:34).
Human si Jesukristo namatay, ang Iyang mga sumusunod mipahimutang sa Iyang lawas sa usa ka lubnganan ug mipaligid og usa ka dako nga bato sa atubangan sa pultahan (tan-awa sa Marcos 15:46). Gibantayan sa mga guwardiya ang lubnganan aron sa pagseguro nga walay mobalhin sa bato.
Human sa tulo ka adlaw, ang kababayen-an nagdala og mga pahumot aron sa pag-atiman sa lawas ni Jesus. Nakita nila nga ang bato nabalhin gikan sa lubnganan. Misulti ang usa ka anghel kanila, “Ayaw kamo kahadlok” (Mateo 28:5).
Buhi Siya! Ang lubnganan walay sulod tungod kay nabanhaw si Jesukristo. Ang anghel miingon, “Wala na siya dinhi; kay siya nabanhaw” (Mateo 28:6). Tungod sa Manluluwas, mabuhi kitang tanan pag-usab human kita mamatay.