“Usa ka Pagdapit sa Pasko sa Pagkabanhaw ,” Higala, Abril 2025, 2–3.
Gikan sa Unang Kapangulohan
Usa ka Pagdapit sa Pasko sa Pagkabanhaw
Gikuha gikan sa “Forgiving Others: An Easter Message from President Russell M. Nelson” (bidyo), Librarya sa Ebanghelyo.
Niining Pasko sa Pagkabanhaw, naghunahuna ko bahin sa usa sa kataposang mga takna sa kinabuhi sa Manluluwas dinhi sa yuta. Samtang Siya gilansang sa krus didto sa Kalbaryo, Ang Manunubos misulti niining mga pulonga: “Amahan, pasayloa sila; kay wala sila mahibalo sa ilang gibuhat” (Lucas 23:34).
Walay butang nga sayon mahitungod sa pagpasaylo. Apan kon kita mopili sa pagpasaylo, itugot nato nga ang Ginoo mohupay ug mopahumok sa atong mga kasingkasing. Kini nagtugot kanato sa pagtan-aw sa uban, ilabi na niadtong kinsa nakahimo og sayop kanato, isip mga anak sa Dios ug sa atong mga kaigsuonan.
Akong minahal nga mga higala, dapiton ko kamo sa paghunahuna ug pag-ampo kon aduna bay usa ka tawo nga kinahanglan ninyong pasayloon. Wala koy mahunahunaan nga mas maayong paagi sa pagpasidungog ni Jesukristo karong Pasko sa Pagkabanhaw. Akong isaad nga kon kamo mopasaylo, ang Prinsipe sa Kalinaw modala kaninyo og kalinaw.
Si Jesukristo nabanhaw. Siya nahigugma kaninyo. Ug tungod Kaniya, kamo makasinati sa hingpit nga kalipay ug sa milagro sa pagpasaylo.
Pag-ihap Hangtod sa Pasko sa Pagkabanhaw
Paghimo og kalihokan alang sa matag adlaw paingon sa Pasko sa Pagkabanhaw aron sa pagtabang kanimo sa paghunahuna ni Jesukristo. Human nimo mabuhat ang matag kalihokan, pagkolor og usa ka bulak.
Dominggo sa Lukay
Kantaha o basaha ang mga pulong sa “Siya nabanhaw” (pahina 18).
Lunes
Pag-istorya og usa ka paboritong istorya mahitungod ni Jesukristo.
Martes
Basaha ang Juan 11:25.
Miyerkoles
Moserbisyo og usa ka tawo, sama sa gibuhat sa Manluluwas.
Huwebes
Kantaha o paminawa ang “Getsemani” (Mga Himno—Alang sa Panimalay ug Simbahan, nu. 1009).
Biyernes Santo
Basaha ang mensahe sa Pasko sa Pagkabanhaw diha sa pahina 2.
Sabado
Basaha ang 3 Nephi 11:9–17.
Dominggo sa Pasko sa Pagkabanhaw
Buhata ang programa sa Pasko sa Pagkabanhaw diha sa pahina 24 aron masaysay ang istorya sa Pasko sa Pagkabanhaw.
Mga paghulagway pinaagi ni Róisín Hahessy