Ang Pag-ampo alang sa Pagkat-on og Piano

Si Miguel miabli sa iyang piano music ug mitutok sa itom nga mga nota diha sa pahina. Ang iyang titser bag-o lang naghatag niya og usa ka bag-ong kanta nga tugtogon. Ingon og komplikado gyod kini! Kini nga usa magkinahanglan og panahon nga makat-onan.

Gibutang niya ang iyang mga tudlo sa mga key ug nagsugod sa pagpangita sa husto nga mga nota sa piano. Plink, plink, PLUNK. Balik-balik niyang maigo ang sayop nga mga key kon siya mopatugtog.

Nganong dili man niya makuha ang hustong mga nota? Kini nga awit mas lisod pa kay sa mga awit sa Primary nga ganahan niyang ipatugtog. Gisapot na siya og maayo! Iyang gibusdak ang iyang mga kamot diha sa mga key sa piano. Blonk!

“Miguel?” Misangpit si Mamá. “OK ra ba diha ang tanan?”

“Oo.” Nanghupaw si Miguel. “Kini nga awit lisod lang gyod kaayo.”

Misulod si Mama sa kwarto. “Gikasubo kong gisapot ka. Nag-ampo ka ba sa wala pa ka magsugod og praktis?”

“Wala.” Si Miguel wala makahunahuna niana.

“Kon ako magkat-on og butang nga bag-o, ganahan ko nga mag-ampo sa dili pa ko magpraktis. Ang Langitnong Amahan anaa aron sa pagtabang kanato. Dili igsapayan kon nagdula ka og sports, naghatag og pakigpulong sa simbahan, o nagpatugtog sa piano. Kita kanunayng makapangayo Kaniya og tabang, tungod kay kita dili kanunayng makahimo niini nga kita lang.”

Makatabang ba gayod kaniya ang pag-ampo sa pagkat-on sa iyang bag-ong awit diha sa piano? Mihukom siya nga sulayan kini.

Pagkasunod adlaw milingkod na usab si Miguel sa piano, andam na nga magpraktis. Apan sa wala pa siya magsugod, nakahinumdom siya sa pag-ampo.

“Langitnong Amahan,” miingon siya, “tabangi ko nga makat-on sa akong bag-ong kanta. Lisod ang pagkat-on niini, apan nasayod ko nga makahimo ko niini uban sa Imong tabang.”

Dayon iyang gihuman pinaagi sa pagpasalamat sa Langitnong amahan alang sa iyang mga panalangin. Ang iyang mga bukton relaks, ug andam na siya sa pagpraktis.

Sa hinay-hinay nagsugod siya sa pagpangita sa mga nota sa mga key ug sa pagdula kanila sa usa human sa usa. Nagpadayon siya sa pagbansay. Sa wala madugay, makatugtog na siya sa sinugdanan sa kanta! Wala gani siya makabantay kon unsa ka dugay na siya nga nagbansay.

Milili si mama sa kwarto. “Wow, Miguel. Maanindot na kining paminawon!”

“Salamat!” miingon si Miguel. “Sa akong hunahuna ang pag-ampo sa dili pa ako magpraktis nakatabang kanako nga magmapailobon ug makakat-on og ginagmay sa matag higayon.” Gipakli niya ang mga pahina sa kanta. “Kini mas maayo pa kay sa pagsulay sa pagkat-on sa tanan diha-diha dayon.”

“Nindot ang imong pagsugod” Miingon si mama nga nagpahiyom. “Sa dili madugay, makat-on ka sa tibuok kanta.”

Mibalos og pahiyom si Miguel. Dayon iyang gibutang ang iyang mga kamot sa mga key ug misugod sa pagpatugtog.

Open PDF

Mga paghulagway ni Tracy Nishimura Bishop