Usa ka Bag-ong Higala

Mitabang si Taylor ni Mama sa pagdala sa mga kasangkapan alang sa kalihokan sa Primary padulong sa parke. Gibati niya ang kainit sa adlaw diha sa iyang nawong, ug ang mga sagbot sa parke berde na usab. Nindot kaayo ang pamati nga makagawas!

Ang tingpamulak usa ka butang nga nagpahinumdom niya nga ang Langitnong Amahan nagmahal kaniya. Ganahan si Taylor nga mangita sa gugma sa Dios diha sa tanang butang—sama sa asul nga kalangitan o makita ang iyang mga higala sa kalihokan sa Primary.

Misunod si Taylor ni Mama kon diin ang ubang mga lider sa Primary nagpahimutang og mga dula alang sa mga bata.

Miwara-wara si Sister Kingsley ug miingon, “Si Jane nagpaingon na!”

“Maayo kana!” Miingon si Mama.

“Kinsa si Jane?” Nangutana si Taylor.

“Siya ang bag-ong batang babaye nga among gidapit. Nanghinaot kami nga ikaw ug ang ubang mga bata makatabang kaniya nga mobati nga giabiabi,”miingon si Mama.

Mibati og kabalaka si Taylor. Ang papakigsulti ngadto sa bag-ong mga tawo lisod para kaniya. Gusto siya nga magmabination. Apan unsaon man kon ang bag-ong batang babaye dili ganahan niya?

Sa wala madugay, ang tanan miabot, lakip ang usa ka batang babaye nga wala mailhi ni Taylor.

“Welcome sa atong kalihokan sa Primary!” Miingon si Sister Kingsley. Iyang gipatong ang iyang kamot sa abaga sa bag-ong batang babaye. “Mao kini si Jane. Moapil siya kanato karon. Manghinaot kami nga ang tanan mag-uban nga malingaw sa pagdula sa parke.”

“Mahimo bang magdula kita og grounders [dakop-dakop]?” nangutana ang usa sa mga bata sa Primary.

“Oo, palihog!” Misinggit si Taylor.

Naghinam-hinam kaayo siya! Ang grounders mao ang iyang paboritong dula. Nakiglumba si Taylor sa ubang mga bata ngadto sa dulaanan. Dayon mihunong si Taylor sa dihang nakita niya si Jane nga nag-inusarang nagbarog.

Ang Langitnong Amahan mihatag kaniya niining maanindot ug espesyal nga adlaw. Gusto siya nga malingaw niini, ug gusto siya nga si Jane malingaw usab niini. Mibati og kakulba si Taylor, apan miginhawa siya og lawom ug mibalik og lakaw padulong ni Jane.

“Kumusta. Ako si Taylor.”

“Kumusta.” Mipahiyom si Jane og gamay, apan murag gikulbaan usab siya.

“Nakadula na ba ka og grounders sa una?” Nangutana si Taylor.

Milingo-lingo si Jane.

Nasayod si Taylor kon unsay bation nga makulbaan mahitungod sa bag-ong mga butang.

“Makalingaw gyod kini!” Miingon si Taylor. “Ang tawo nga maoy ‘hago‘ pabilin nga magpiyong samtang sila mosulay sa pagdakop sa usa ka tawo nga nakatungtong sa ekipo diha sa dulaanan. Ang tanan mahimong makadagan-dagan. Apan kon ang tawo nga ‘hago’ mosinggit og ‘grounders!’ nan bisan kinsang tiil nga naa gihapon sa yuta mao ang ‘hago.’”

Gikulbaan gihapon si Jane.

“Gusto ka ba nga magpabilin uban nako og kadiyot?” Nangutana si Taylor.

Mipahiyom si Jane. “Oo!”

Si Taylor ug si Jane nanglakaw ngadto sa dulaanan. Samtang misaka sila sa ibabaw, ang ubang mga bata mitimbaya ni Jane. Si Jane nagpabilin sa duol ni Taylor sa sinugdanan, apan sa wala madugay ang ubang mga bata mitabang usab ni Jane. Sulod sa tibuok nga kalihokan sa Primary, si Taylor ug ang uban pang mga bata nakigsulti kang Jane. Sa kataposan, si Taylor wala na mobati og kakulba, ug segurado kaayo nga si Jane wala usab.

“Aduna bay ganahan og ice pop?” Miingon si Mama samtang giablihan niya ang usa ka cooler.

Pagkahuman sa tanang pagdagandagan ug pagdula, mibati og kalipay si Taylor nga makalingkod kauban sa iyang mga higala ug mopahulay. Sa dihang mipauli na si Jane, si Taylor ug ang ubang mga bata nanamilit kaniya.

Sa wala madugay si Taylor, iyang mama, ug ang ubang mga lider na lang. Gipamunit ni Taylor ang mga putos sa mga ice pop ug gibutang kini sa bag nga basurahan.

“Mapasigarbohon kaayo ko nimo,” miingon si Mama. “Ikaw ug ang imong mga higala mipakigbahin sa gugma sa Langitnong Amahan ngadto ni Jane karon.”

Naghunahuna si Taylor mahitungod niana. Bisan og sa kasagaran mangita siya og mga paagi nga ang Langitnong Amahan mipakita sa Iyang gugma alang kaniya, karong adlawa lahi. Karon, siya mao ang nagpakita sa Iyang gugma.

Paghulagway pinaagi ni Hollie Hibbert