Stap Lisin long Tabu Spirit

Chim i openem ol ae blong hem we i wantem silip yet. !Hem i wiken nao!

Mama i singaot, “taem blong wekap nao o bae yumi let.”

Chim i wantem tumas blong silip yet , be tedei hem i dei blong go long maket. Hem i nidim blong helpem mama blong pem kaekae blong ful wik. Mekem se hem i wekap mo kakae kwik brekfas blong hem.

Mama i bin mekem plante samting blong Chim mo tufala brata blong hem. Hem i bisi tumas blong wok, mo mekem se hem i nogat inaf taem blong stap long haos. Chim mo tufala brata blong hem oli wok tugeta blong mekem ol wok blong haos. Chim i glad blong help.

Taem we mama mo Chim i kambak long maket, mama mas go long wok nao. Taem hem i go wok, Chim mo ol brata blong hem i rere from Sandei. Chim i rere long ol sus, traoses, mo set we bae hem i werem i go long jos tumoro. Bigfala brata blong hem Robin i helpem hem blong aenem set blong hem. Afta oli mekem kaekae blong naet.

Chim i stap klinim kijin taem mama i kambak long haos. Hem i taet tumas.

“Hemia blong yu, mama.” Chim i givim long hem wan bol blong hot kakae.

Mama i smael. “Tangkyu long help blong yu tedei. !I naes tumas!”

Long nekis moning, Chim i wekap eli mo i rere blong go long jos. Hem i glad blong luk ol fren blong hem long Praemeri mo lanem abaot Jisas Kraes.

“?Mama?” hem noknok long doa mo singaot kwaet. ?Bae yu kam long kam long jos wetem mifala tedei?

“Mi no save kam,” Mama i talem. “Mi mas wok long aftenun ia.”

“Okei.” Chim i harem nogud smol. Kolosap wan yia nao we Mama i nomo go long jos wetem olgeta. “Draev sef mo gat wan gud dei,” hem i talem long mama blong hem.

Smol brata blong hem, Matiu i askem, “?yu rere blong go?”

“!Yes!” Chim i werem ol sus blong hem mo i ron i go aotsaed long doa wetem ol brata blong hem blong faenem wan bas.

Chim i hapi taem hem i wokbaot i go insaed long bilding blong jos. Hem i traem blong tingbaot Jisas Kraes long taem blong sakramen. Mo long taem blong Praemeri, hem i traem blong lisen long lesen blong Sista Ortega.

Sista Ortega i talem, “Tedei bae yumi lanem abaot Tabu Spirit.” “Tabu Spirit i karem ol mesej blong Papa long Heven i kam long yumi. Olsem hemia long redio.”

Chim i stap lukluk long redio we Sista Ortega i stap holem.

Hem i eksplenem, “wan redio i save wok nomo taem i kasem wan signol mo putum i go long wanem janel yu wantem lisin long hem.” “Yu mas putum long stret janel blong lisin long hem. Blong harem Tabu Spirit, yumi nidim blong putum ol hat mo maen blong yumi long raet janel tu. ?Olsem wanem nao yumi save mekem hemia?”

Evriwan oli stap tingting. Afta Chim i talem, “taem yu folem Jisas Kraes mo stap obei olgeta komanmen blong hem”

Sista Ortega i smael. “Yes. Hemia nao”

Afta long jos, Chim i help blong mekem kaekae blong naet bakegen. Hem i gat wan wom filing taem hem i stap help. Hem i save se taem hem i stap givim seves i go long famli blong hem, hem i stap putum hat blong hem long raet janel blong i save filim Tabu Spirit.

Taem mama i kasem haos, Chim i givim hem wan bigfala hag. Afta oli blesem kakae mo stat blong kakae.

Chim i talem, “traem talem se mifala lanem wanem long jos tedei.” Hem i laekem blong tokbaot Praemeri long mama blong hem.

“?Wanem?” Mama i askem.

Chim i talem, “mifala i lanem abaot Tabu Spirit.” “!I olsem wan redio!” Taem yumi obei ol komanmen, yumi tanem ol hat blong yumi i go long raet janel blong lisin long Hem.”

Mama i sakem hed blong hem blong agri. “Hemia i gud tumas ?Okei, wanem nao i wan eksampol blong obei long ol komanmen?”

Chim i smael. “!Helpem mama blong yu!” Hem i laf. “Mi lavem yu Mama.”

Ol pikja droing i kam long Uran Duo