Singsing blong Ronemaot Fraet

“Taem blong silip,” Mama i talem wetem wan smael.

Logan i go insaed long rum blong hem. Hem i talem ol prea blong hem mo i go silip. Afta Mama i ridim hem wan stori. Sloslo hem i sarem ae blong hem. I no longtaem hem i silip.

Be Logan i drim long wan rabis drim. Hem i stap hemwan long tudak. Hem i luk wan bigfala monsta, we i gat ol sap nel wetem bigfala tut. Monsta i kros long hem. Afta, !i stat blong ron i kam from hem!.

Logan i traem blong ronwe. !Be hem i ski afta i ful daon! Monsta ia i stap kam kolosap mo kam bigwan kasem taem—

Logan i wekap mo i sidaon long bed. Hem i waepem wota blong ae blong hem mo luk se ples i dak yet aotsaed.

Hem i wantem wokbaot i go long rum blong mama mo papa blong hem blong tokbaot drim blong hem. Be hem i no wantem kamaot long bed blong hem. Tudak ia i mekem hem i filim olsem se wan monsta i stap haed samples. Evri sado i mekem hem i fraet. Wan dog i stap singaot aotsaed i saon olsem wan monsta we i kros.

Logan i pulum blangket blong hem kasem nus blong hem. Be mi fraet tumas blong muv.

Hem i wantem blong gobak silip bakegen. Be evri taem hem i sarem ae blong hem, hem i luk fes blong monsta ia we i kros i stap wetem ol sap tut blong hem. Hem i no stop blong stap lukluk ol sado we i stap mekem hem i fraet.

Afta, hem i luk wan pikja long tebol long saed long bed blong hem. Hem i wan foto blong tufala brata blong hem, Papa, mo Mama blong hem aotsaed long tempol long Monterei, Meksiko. Oli luk hapi.

I no longtaem ol toktok blong fevret Praemeri singsing blong hem i kam long maen blong hem. “Mi laekem blong luk tempol,” Logan i stat blong singsing kwaet. “Wan dei bae mi go ia. Blong filim Tabu Spirit, blong lisin mo blong prea.”*

Taem hem i stap singsing, Logan i tingbaot dei ia long tempol wetem famli blong hem. Hem i bin filim pis. From tempol, hem i save stap wetem famli blong hem blong oltaem.

Logan i no save harem dog i singaot bitim saon blong voes blong hem. Logan i sarem ae blong hem mo i gohed blong singsing. “Olsem wan pikinini blong God, mi bin lanem trutok ia: Wan famli blong taem we i no save finis.” Hem i filim wan pis long hat blong hem nao i mekem hem i smael. Hem i bin save se i nogat wan monsta.

Rum i bin tudak mekem hem i fraet. Be naoia i kwaet, mo sef. Logan i lei daon long pilo blong hem mo silip wetem pis bakegen.

Taem hem i wekap, i gat san aotsaed. Hem i sidaon mo lukluk long san we i saenem foto blong hem long tempol. Hem i stap singsing fevret singsing blong hem taem i stap rere blong go long jos.

Taem oli stap go long jos, hem i talem long famli blong hem abaot drim blong hem mo singsing we hem i bin singsing long hem. Hem i lisin long ol toktok mo singsing ol hym insaed long japel. Naoia i taem blong go long Praemeri.

Logan i laekem blong lisin long piano. Mo hem i save se i gat sam singsing we i gat paoa ia blong ronemaot ol monsta.

“Welkam long taem blong singsing,” Praemeri lida i talem. “?Wanem singsing nao bae yumi singsing faswan?”

“Mi save!” Logan i talem, i stap putum han blong hem i go antap. “Bae yumi singsing ‘Mi Laekem blong Luk Tempol.’”

Ol pikja droing oli kam long Carolina Farías