Stap Filim Harem Nogud

Savannah i pulum blangket i kavremap hed blong hem. Tedei i bin wan rabis dei.

Long skul tedei, Savannah i no save tingting nomo long wan samting. Hem i filim se hem i taed, i kros, mo i harem nogud. Hem i filim se i gat wan samting i mekem bel blong hem i hevi mo i no lus nomo. Long en blong dei, hem i wantem blong krol i go andanit tebol blong hem mo haed.

I no long taem i pas, Savannah i filim se hem i stap harem nogud kolosap evri dei. Ol fren blong hem i traem blong mekem hem i hapi, be fulap taem Savannah i no wantem stap wetem olgeta. Oltaem oli luk hapi. Samtaem hem i stap tingting se bae oli moa hapi sapos hem i no stap.

?Wanem i rong wetem mi? Savannah i stap askem hemwan. ?From wanem mi no save hapi olsem evriwan?

Hem i filim se hem i kolkol mo i stap hemwan olsem ol dak blong klaod aotsaed. Mo naoia hem i filim se hem i wantem silip.

Savannah i harem doa blong rum blong hem i open.

“Savannah,” mama blong hem we i sidaon long en blong bed i askem “?wanem i rong?”

“Nogat samting i rong,” Savannah i talem. “Mi taet nomo.”

“?Yu talem tru? Mama i askem. “Mi stap wari from yu.”

“Mi Oraet,” Savannah i talem.

“I stret.” Mama i stanap. “Tingbaot nomo se yu save toktok long mi abaot eni samting. Mi lavem yu.”

Savannah i stap long bed blong hem kasem taem blong kakae long naet. Long naet ia, hem i no save silip. Bren blong hem i no save stop blong tingting long evri samting.

Long nekis dei, hem i harem se hem i taet tumas. Bae hem i wan nara longfala dei. Savannah i kasem haos afta skul mo i sidaon long tebol long kijin Hem i pulum win blong hem mo lukluk i go aotsaed long windo. I sno bakegen.

“?Savannah?”

Savannah i tanem hem mo i sek blong luk bubuwoman blong hem i kam insaed long kijin.

“Halo bubuwoman,” Savannah i talem. “Yu stap mekem wanem long ples ia?”

Bubuwoman i sidaon. Hem i talem, “mama blong yu wantem mi blong kam.” “Hem i stap wari from yu.”

“Mi stap taet nomo. Be mi oraet nomo,” Savannah i talem.

Bubuwoman i smael gud long hem. “?Mi bin talem long yu long sama taem we bubuman mo mi i bin muv?”

“Mi no ting se yu bin talem,” hem i talem.

“Mi bin harem nogud evri taem,” bubuwoman i talem. Mi wantem blong stap hapi, be mi no wantem save long evri samting. Mi filim se mi stap miwan.”

“Be yu gat bubuman mo mama blong mi.” Savannah i lukluk daon long tufala sus blong hem. “?From wanem yu filim se yu stap yuwan?”

Bubuwoman i talem se, “mi no save wanem nao i rong.” “Mi neva gat kaen filing ia bifo. Mekem se mi mas go luk dokta.”

“?Wanem i hapen?”

Bubuwoman i putum han blong hem raon long hem. “Mi faenemaot se mi gat sik long tingting.”

“O, ?i minim se yu harem nogud?” Savannah i askem.

Bubuwoman i eksplenem se, “No, sik long tingting hem i moa blong filing harem nogud.” “Harem nogud blong mi ia i no lus nomo. Mi faenem i had blong mekem ol samting we mi stap mekem oltaem. Mo mi faenem i had blong konek wetem ol nara pipol, wetem ol famli blong mi tu. Mi rili nidim help.”

Savannah i lukluk i go antap. “?Wanem kaen help?”

Bubuwoman i talem, “Dokta i eksplenem wanem i rong , mo mitufala mekem ol plan blong helpem mi harem gud.” “Be samtaem mi stap harem nogud yet. Mi spenem fulap taem blong prea. Taem mi filim se mi stap miwan, mi stap pikjarem Sevya long saed blong mi. Mi filim gud taem mi stap tingbaot Hem.”

Savannah i lukluk sno aotsaed long windo mo i kolkol. “Mi harem nogud fulap tu. Mi traem blong mi stap hapi, be samtaem mi no save nomo, mo mi stap kros long miwan from mi stap filim olsem ia.”

“Mi save hemia, hani.” Bubuwoman i givim Savannah wan hag. “Mi stap filim olsem ia tu samtaem. Be yu no stap yuwan. Mi lavem yu, papa mo mama blong yu lavem yu, mo Papa long Heven mo Jisas Kraes i lavem yu. Oli andastanem harem nogud ia we yu stap gotru long hem mo bae oli neva lego yu.”

Ating bubuwoman i talem tru Savannah i stap tingting. Mi no stap miwan. Samting we i hevi long bel blong Savannah i nomo hevi.

“Mi ting se bae mi mas toktok long mama,” Savannah i talem. “Hem i wantem blong helpem mi tu.”

“Hemia wan gudfala tingting.” Bubuwoman i holem han blong Savannah.

Savannah i smael mo i lei long solda blong bubuwoman. Hem i harem se hem i nomo kolkol mo i filim se hem i nomo stap hemwan.

Ol pikja oli kam long Marina Pessarrodona