Biskit Merikel

I kam long Julia A. Anderson

“Papa long Heven, mifala i nogat kaekae blong dina. Plis helpem mifala.”

Wan tru stori we i kam long YSA.

Pikja droing blong wan paeonia gel mo wan pikja droing blong hip blong strong biskit.

Kolkol win i blo, mo sno i tantanem hem raon long hankat. Jane i pulum tintin blangket blong hem kasem ol solda blong hem. Leg blong hem i taet, be hem i gohed blong wokbaot. Oli stap wokbaot blong go long Sol Lek Siti, Yuta.

Jane mo famli blong hem i lanem abaot Jos Ia blong Jisas Kraes blong Ol Lata-dei long Inglan. Taem we profet i askem ol Jos memba blong kam long Yuta, famli blong hem i sevem evri mane we oli gat blong oli go. Oli sel krosem solwota. Naoia oli stap travel long hankat blong krosem ol hil. Oli wokbaot blong plante manis, mo kaekae blong olgeta i stap finis.

Wota blong ae i foldaon long jik blong Jane. Hem i talem long bigfala brata blong hem Thomas,“mi hanggri we.” “!Mi no ting se bae mi save wokbaot i go moa!”

Thomas i katem wan pis blong skin blong wil blong hankat. Hem i talem, “hemia, yu kakae.” “Evri samting bae i Oraet.”

“Tangkyu,” Jane i wispa taem hem i stap kakae smol strong pis blong skin blong wil ia.

I no long taem, i taem blong oli kamp blong naet. Sam long ol man oli aot blong lukaotem bafalo. Jane i wantem tumas blong oli faenem wan. Bel blong hem i emti. Taem oli stap wet, Jane mo famli blong hem oli fasfas tugeta raon long wan smol faea, oli taet, hanggri mo kolkol.

“Yumi talem wan prea,” Jane i talem.

Famli ia i nil daon tugeta, mo mama i prea. “Papa long Heven, mifala i nogat kaekae blong dina. Plis helpem mifala.”

Jane mo ol brata mo sista blong hem i sidaon kwaet blong wan smol taem. Afta mama i sidaon stret.

“?Wanem ia?” Thomas i askem.

“Mi jes tingbaot wan samting.” Mama i hariap i go long hankat mo i open bokis blong famli. Afta hem i pulumaot wan aean bokis mo openem. Insaed i gat tu biskit we tufala i strong we. Oli ol haf biskit long trip blong olgeta taem oli krosem solwota sam manis pas.

Jane i harem se hem i hapi we. !Oli bin gat kakae! “Yumi save brekem olgeta i go long ol smol pis blong serem,” hem i talem.

Be taem oli traem blong kakae ol biskit ia, i strong tumas blong oli kakae iven blong oli brekem long haf.

“Yumi traem hemia,” mama i talem. Hem i putum ol biskit long Daj oven mo putum smol wota long hem. Afta hem i putum lid mo putum hevi sospen antap long jakol.

Paeonia famli ia i kam tugeta raon long faea.

Jane mo famli blong hem i prea bakegen. Hem i tingbaot stori blong Jisas Kraes long olgeta skripja, taem we Jisas i fidim faef taosen man wetem faef bred mo tu fis. Hem i save se Papa long Heven bae i save helpem hem tu.

Smol taem afta, mama i openem sospen. Sospen ia i fulap gud i kam antap long kaekae! Kaekae hem i inaf blong fidim ful famli.

Jane i haggem mama blong hem strong. “!Hemia i wan merikel!”