O Le Meaalofa Sili i Meaalofa Uma

Sa lē nofo lelei Jessica i totonu o le taavale a o agai atu i le uarota a le uso o lona tina ma lona toalua. Sa toe o nai aso oo i le Kerisimasi, ae sa ia le’i fia faamanatuina.

I le amataga o lena vaiaso mu ai lona fale. Sa saogalemu tagata uma, ae na faaleagaina lo latou fale. O le tele o a latou mea na faaleagaina. Sa siitia atu Jessica ma lona tina, tuagane, ma uso e toalua i le fale o le uso o lona tina ma lona toalua seia oo ina mafai ona toe faaleleia lo latou fale.

Sa ataata atu le uso o lona tina ia te ia. “Ou te iloa o le a e maua se taimi fiafia i la matou Peraimeri,” o lana tala lea.

Sa le’i mautinoa tele Jessica. Sa popole o ia e alu i se isi Peraimeri. O le a ou le iloa se tasi, sa ia mafaufau ai. Pe o le a latou agalelei mai ea ia te a’u?

Sa taumafai Jessica e ’aua le mafaufau i le mu a o savali atu o ia i le Peraimeri. Sa ia uuina le lima o lona tausoga laitiiti o Sam ma fesoasoani ia te ia e sue lona nofoa. Sa usuina e le Peraimeri pese Kerisimasi e uiga ia Iesu. Sa mafaufau Jessica i le auala na o ese ai Iosefa ma Maria mai lo la aiga ina ua fanau mai Iesu. Sa ia mafaufau pe na latou lagonaina le leiloloa ma le tuuatoatasi, e pei ona ia lagonaina i le taimi nei.

Ina ua oo i le taimi o le vasega, sa atili ai ona popole Jessica. Sa ataata atu seisi teneititi ia te ia. “Talofa, O a’u o Anna. E te fia nofo i o’u tafatafa i le vasega?”

Sa toe ataata atu ai Jessica. “Ioe.”

I le vasega sa latou faitau ai i tusitusiga paia e uiga i le taimi na fanau ai Iesu Keriso. Fai mai le faiaoga, o Sister Rios, o le Faaola o le meaalofa silisili lea a le Tama Faalelagi i le lalolagi. “Aua ua faapea lava ona alofa mai o le Atua i le lalolagi, ua ia aumai ai lona Atalii pele e toatasi.”^* sa ia faitau atu i le vasega.

E le’i mafaufau muamua lava Jessica ia Iesu o se meaalofa. Sa mafaufau o ia i a latou meaalofa o le Kerisimasi na faaleagaina i le afi. Sa fiafia o ia e maua ni meaalofa ma sa faanoanoa ona ua leai ni ana meaalofa. Ae sa sili atu lona alofa ia Iesu ma sa ia iloaina o le a le alu ese lava o Ia.

I le faaiuga o le vasega, sa avane ai e Sister Rios ni nai pusa laiti mai lana ato. Sa tofu i latou ma sina faatagata vane laitiiti o le pepe o Iesu.

“E i ai sa’u meaalofa mo outou taitoatasi.” Sa amata ona tufa atu e Sister Rios ia pusa. “E mafai ona fesoasoani ia te oe e manatua ai e alofa tele le Atua ia te oe, o lea na Ia auina mai ai Lona Alo mo oe.” Ona ia tilotilo atu lea ia Jessica. “Jessica, ou te matua faamalie atu. “Ou te le’i aumaia se mea mo oe. Ou te le’i iloa o le a e i ai iinei.”

Sa tilotilo ifo Jessica i ona lima ma taumafai e ’aua ne’i tagi. Na te le’i iloaina foi o le a i ai o ia iinei. Sa moomoo o ia maimau pe ana mafai ona i ai o ia i lona lava fale, i lana lava vasega o le Peraimeri mo le Kerisimasi.

O le taimi lava lena, na tuu ai e se tasi se pusa i ona vae. Sa tilotilo a’e o ia i luga ma vaaia ai Anna o ataata atu ia te ia. “Manuia le Kerisimasi! E mafai ona ave ma oe la’u pusa.”

Sa pa’i malie atu Jessica i le pepe laitiiti o Iesu. “Faafetai! Manuia foi le Kerisimasi ia te oe!”

Ina ua tuua le lotu, sa opo o ia e Tina. “Na a mai le peraimeri?” na ia fesili ai.

“Lelei! Sa ou mauaina lenei mea o se meaalofa.” Sa ataata Jessica. “Ma sa ou aoaoina o Iesu o le meaalofa silisili lea o meaalofa uma.”

Ata na tusia e Shawna J. C. Tenney