O Le Tala o le Kerisimasi

I aso ua leva, sa sau ai se agelu e igoa ia Kaperielu i se tamaitai talavou e igoa ia Maria.

Sa ta’u atu e le agelu ia te ia o le a ia fanauina se pepe e igoa ia Iesu ma o le a avea o Ia ma Faaola o le lalolagi.

A o le’i fanau Maria, na malaga atu i la’ua ma lona toalua o Iosefa i Peteleema.

Ina ua la taunuu, sa leai se avanoa mo i la’ua i le faletalimalo.

Na oso a’e se fetu fou i le lagi i lena po.

Ina ua fanau mai Iesu, sa tuu o Ia e Maria i totonu o se faatanoa.

Sa ia afifiina o Ia i se ie ina ia faamafanafanaina ma saogalemu ai o Ia.

Na asiasi atu se agelu i leoleo mamoe ma ta’u atu iā i latou le tala fiafia. Ua oo mai le Faaola!

Na faanatinati atu leoleo mamoe i le fale o manu ma maua ai le pepe o Iesu o loo taoto i totonu o se faatanoa.

Sa matuai fiafia lava leoleo mamoe! Sa latou o atu ma ta’u atu i isi ua fanau mai Iesu Keriso.

E mafai foi ona tatou faasoa atu le tala lelei o le soifua mai o Iesu—i le taimi o le Kerisimasi ma i taimi uma!

Ata na tusia e Audrey Day