Manatuaina o Iesu

Sa matamata Victoria i le faaata a o seluina e Tina lona lauulu. Ua toeitiiti lava oo i le taimi mo le lotu.

“Aisea tatou te o ai i le lotu?” Na fesili ai Victoria.

Sa tuu i lalo e Tina le selu. “Tatou te o i le lotu e tagofia le faamanatuga ma aoao e uiga ia Iesu Keriso.”

“Ae aisea?” Na fesili ai Victoria.

“O le areto ma le vai e fesoasoani ia i tatou e manatua ai le auala na puapuagatia ai Iesu ma maliu ai mo i tatou,” o le tala lea a Tina. “Pe a tatou tagofia le faamanatuga, tatou te manatua mea lelei uma na Ia faia. Ma ua tatou folafola atu e taumafai foi e fai mea lelei.”

Sa ataata Victoria. “Ina ia mafai ona tatou faapei o Iesu.”

“E sa’o lena!” Sa fesoasoani Tina ia Victoria e fai ona seevae. “O le taumafai e pei o Iesu e tatou te fiafia ai.”

I le lotu sa nonofo filemu ai Victoria ma Tina ma Tama. Sa le’i leva ae oo i le taimi o le faamanatuga. Sa punou lona ulu ma faalogologo i le tatalo.

Sa toso mai e Tina se pepa mai lana ato. “O se tusi faapitoa lenei,” sa ia musumusu mai ai. “E mafai ona fesoasoani ia te oe e manatua ai le Faaola i le taimi o le faamanatuga.”

Sa tatala e Victoria le tusi. Sa tele ata o Iesu Keriso. O se tasi o ata na faaalia ai o Ia o se pepe i totonu o se faatanoa. O le isi na faaalia ai lona papatisoina. Na manatua e Victoria lena tala mai le Peraimeri. E iai fo’i se aso e papatiso ai o ia!

Sa tuu atu e Tina le fata falaoa. Sa ave ma le migao e Victoria se fasi falaoa. Ona toe tepa lea i tua i lana tusi. I le itulau na sosoo ai sa i ai se ata o Iesu o loo tatalo i totonu o se faatoaga. Sa iloa e Victoria sa Mafatia o Ia mo agasala a tagata uma ma lagonaina lo latou tiga ma le faanoanoa. E alofa moni lava o Ia ia i tatou, o lana manatu lea.

Sa faaauau pea ona liliu e Victoria ia itulau. E tele ata na faaalia ai le fesoasoani atu o Iesu i isi. I se tasi ata, sa Ia aoaoina tagata. I se isi, sa Ia faamaloloina ai se tagata tauaso. Sa i ai foi se tasi o Ia ma tamaiti.

Ona sosoo ai lea ma le taimi o le vai. Sa punou le ulu o Victoria i le taimi o le tatalo. Ona pasi atu lea e Tina o le fata ia te ia.

Sa ave e Victoria sina ipu vai e inu ai. Sa mafaufau o ia i le alofa o Iesu Keriso i isi. Sa faatumulia lona loto i se lagona mafanafana. Sa manao foi o ia e agalelei ma alofa.

“Tina, ou te fia pei o Iesu,” o le musumusu mai lea a Victoria.

Na ataata Tinā. “O le mea lena ou te maua ai le fiafia. Ou te iloa e faafiafiaina ai foi o Ia.”

Sa ataata foi Victoria. Sa alofa o ia ia Iesu Keriso. Sa ia manao e manatua pea o Ia.

O ata na tusia e Tammie Lyon