O Moligao i le Po o le Vaeluaga o le Kerisimasi

Sa savavali filemu Joska ma lona aiga i le kiona. O le Po o le Vaeluaga o le Kerisimasi, ma sa latou faia se tasi o a latou tu ma aga masani e sili ona fiafia i ai. O tausaga uma lava, e asiasi atu ai tagata i Finelani i le fanuatanu e tutu moligao i tuugamau o e pele ia i latou.

E tele moligao sa susulu iila i le pogisa. E ui lava sa malulu, ae sa latou faia le fanuatanu e lagona ai le mafanafana ma le filemu.

Sa taitai atu i latou e matua o Joska i se tuugamau. “O ai lenei?” o le fesili lea a lona tuafafine laitiiti o Aasa.

“O le uso o lo’u tamamatua lenei,” o le tala lea a Tina.

Sa faasino atu Turo, le uso matua o Joska, i aso o loo i luga o le maa. “Sa fanau o ia i le silia ma le selau tausaga ua mavae!”

“Ioe. Ae o loo avea pea o ia ma se vaega o lo tatou aiga.” Sa toso mai i fafo e Tina se moligao. “E te manao e tutu, Joska?”

Sa luelue le ulu o Joska ma tutu le moligao. Ona ia tuuina lea ma le faaeteete o se tapuni uamea e i ai pu i luga. O le a taofia ai le matagi mai le tapeina o le afi. Sa ia tuuina le moligao i luga o le eleele i luma o le tuugamau. Na foliga matagofie le malamalama susulu malie.

Sa latou o i le isi tuugamau o le aiga. Sa uu e Joska le lima o Aasa a o la savavali.

“Aisea tatou te tutuina ai moligao i luga o tuugamau?” sa ia fesili ai.

“Aua e taua le manatuaina o tagata o o tatou aiga,” o lana tala lea.

“E tusa lava pe na latou ola i le selau tausaga ua mavae?” Na fesili ai Aasa.

“Ioe,” o le tala lea a Tama. “O uso uma o o matou tina, o uso o tama, tausoga, ma matua matutua o se vaega o lo tatou aiga. O i tatou uma o se aiga toatele e tasi ona o Iesu Keriso.”

Sa toe aumai i fafo e Tina se isi moligao. Sa fesoasoani Turo ia Aasa e tutuina.

“Ae aisea tatou te tutuina ai moligao i le Kerisimasi?” Na fesili ai Aasa.

Sa mafaufau Joska i lena mea mo se minute. E mafai ona latou tutuina moligao i le fanuatanu i soo se aso lava. Aisea la i le po o le Vaeluga o le Kerisimasi?

“Atonu ona o Iesu o le Malamalama o le Lalolagi,” o le tala lea a Joska.

Sa ataata Tinā. “O se tali lelei tele lena. Ou te manatu e sa’o oe.” Sa ia fesoasoani ia Aasa e tuu lana moligao i le kiona i autafa o le tuugamau. “Ona o lesu Keriso, e mafai ai ona tatou faatasi ma o tatou aiga e faavavau.” Ma ona sa toe soifua o Ia, o le a toe ola ai foi i tatou uma.”

Sa latou toe laa uma i tua e vaai i moli. Sa emoemo le fanuatanu atoa e pei ua tumu i fetu.

Sa lagona e le loto o Joska le mafanafana a o latou toe savavali atu i le taavale. A latou taunuu i le fale, latou te tatalaina meaalofa ma taaalo i taaloga. Ae o le taimi nei, sa fiafia Joska ua mafai ona ia maua lenei taimi filemu ma lona aiga. O le a faafetai pea o ia mo le malamalama o Iesu.

Ata na tusia e Flavio Remontti