Ua manao Bjorn e Avea ma se Agelu

Sa tilotilo solo Bjorn i pusa tetele uma o pepa malo i lona fale fou. Sa siitia atu lona aiga mai Atenitina i le Iunaite Setete.

Sa taufaafefe le siitia ese atu. Sa le masani i mea uma. Ae sa ia iloa afai e faatasi o ia ma lona aiga, o le a lelei mea uma.

A o fesoasoani Bjorn i lona aiga e tatala latou pusa, sa sii i luga e Mami se pusa tele ma ataata. “O le pusa lenei o loo i ai a tatou teuteuga o le Kerisimasi!” o lana tala lea.

Sa ataata Bjorn. Sa fiafia o ia i le Kerisimasi ma sa fiafia e faamanatuina faatasi ma lona aiga. Sa popole pea o ia i le nofo ai i se nofoaga fou, ae o le iloaina ua toeitiiti lava oo i le Kerisimasi na faafiafiaina ai o ia.

I ni nai aso mulimuli ane, sa nonofo faatasi ai le aiga o Bjorn mo se lesona o le afiafi faaleaiga e uiga i le Kerisimasi. Na faamatala e Papi o le vaitau lea e tuuina atu ai meaalofa.

“Ei! Meaalofa!” Na fai mai ai Bjorn.

“Ioe, o le mauaina o meaalofa e malie,” o le tala lea a Mami. “Ae e sili atu ona taua le tuuina atu o meaalofa i le Faaola.”

“E faapefea ona tatou tuuina atu meaalofa ia Iesu?” o le fesili lea a Bjorn.

“Pe a tatou auauna atu i isi e pei ona sa faia e Iesu, e fiafia ai o Ia,” o le tala lea a Mami.

O le taeao na sosoo ai na faalogoina ai e Bjorn se tuitui i le faitotoa i luma. Sa oso ese o ia mai le moega ma tamoe e vaai po o ai. Ae ina ua tatala e Papi ma Mami le faitotoa, sa leai se tasi na i ai iina. Nai lo lena, na piki mai e Mami se meaalofa laitiiti, iila mai le faasitepu o le faitotoa.

“O fea e aumai ai?” Na fesili ai Bjorn.

“Ou te le mautinoa,” o le tala lea a Mami. “Atonu o se agelu!”

Na faalautele le pupula a Bjorn. “E pei o se agelu mai le lagi?”

Sa ataata Papi. “Leai. O nisi taimi tatou te ta’ua ai tagata o agelu pe a latou faia ni mea agalelei mo i tatou. E pei lava o i latou o fesoasoani a le Tama Faalelagi iinei i le lalolagi.”

Sa oso i luga Bjorn i le ea. “Ou te manao foi ia avea ma se agelu! Ou te fia faia ni mea agalelei mo isi. O la’u meaalofa lena o le Kerisimasi ia Iesu.”

“Manaia le manatu!” Na fai atu ai Papi. “O le a fiafia Iesu i lau meaalofa.”

Mo le vaiaso atoa, e ala a’e Bjorn i taeao uma ma maua se meaalofa fou i le faitotoa. Sa ia lagonaina le alofagia tele ina ua tuua e agelu meaalofa mo lona aiga. Sa manao o ia e faaali atu i lona aiga e alofa foi o ia ia i latou.

O lea na galue ai Bjorn. Sa ia saunia faalilolilo ni meaalofa mo ona matua ma ona tei. Sa ia faaiila atu seevae o Papi a o faigaluega ma sa ia tusia se fatu mo Mami. Ona ia afifiina lea o se tasi o ana taavale meataalo e sili ona fiafia i ai mo lona uso. Sa ia maua ni pulukamu mo lona tuafafine.

Sa tusia ma le faaeteete e Bjorn ia igoa o meaalofa taitasi ma tuu i lalo o le laau Kerisimasi. Sa le mafai ona ia faatali e vaai i o latou foliga fiafia! Sa ia maua se lagona mafanafana i totonu pe a tau lava o le mafaufau i ai.

I le Aso o le Kerisimasi, na tuuina atu ai e Bjorn i tagata taitoatasi o le aiga a latou meaalofa. Sa fiafia tele o ia ma na le mafai ai ona nofo filemu.

Ina ua vaai Papi i ona seevae iila, sa ia fai mai, “Oka, faafetai lava, Bjorn! E foliga aulelei.”

Sa tatala e le uso ma le tuafafine o Bjorn a la’ua meaalofa, ona oso lea i luga e fusi atu ia Bjorn. “Faafetai!” o la tala ia.

Sa ataata Mami ina ua ia tatalaina le ata na tusia e Bjorn mo ia. “Ua e fesoasoani e fai ia matua faapitoa lenei Kerisimasi, Bjorn. Faafetai mo le avea ai ma a matou agelu laitiiti,” o lana tala lea.

Sa lagona e Bjorn le fiafia i totonu. Na ia iloa o le faaalia o le alofa i lona aiga o le meaalofa lelei lea e avatu ai iā Iesu!

Ata na tusia e Daniel Duncan