Stap Strong Taem Yu Fesem Fasin blong Agens, Harem nogud o Ol Hadtaem: Eme Martin

Mi bin lanem smoltaem long laef blong mi blong letem Lod i lidim mi, blong wokbaot long saed blong mi mo letem Hem i daerektem mi. Speseli taem i gat ol hadtaem, i blong letem Hem i hangka blong mi, paoa blong mi. I no isi oltaem. Samtaem hat blong yumi i wantem stap strong nomo. Taem yumi harem nogud, yumi filim se i stret ia nao. Be bes wei blong muv i go fored i blong, oltaem letem Hem i lavem yumi.

Mi tingbaot wan taem we mi gat wan koling long Jos, mi stap traehad blong stap gud oltaem, be hemia i no wanem we ol narawan oli luk long mi. I no hemia nomo, be hem i we—mi stap ekperiensem plante rong jajmen mo nogud tritmen, kasem poen we hemia i mekem mi tingting se, “?Bae mi gohed blong mekem koling blong mi o no? Mi tingting se, ?hemia i spes mo ples blong mi?” Mi rili filim se laef blong mi long saed blong spirit i en ia nao, mo mi mas tekem wan desisen. ?Bae mi letem Lod i lavem mi o bae mi faenem kamfot long ol nara ples?

Mo wetem plante tingting, mi luksave se mi nidim mo wantem Lod long laef blong mi mo ol blesing we i kam long Hem moa bitim sapos mi lego Hem. From hemia, mi wantem blesing blong sakramen evri wik mo paoa blong spirit long sol blong mi. Blong save kasem tempol mo ol kavenan we i kam wetem. Mo taem mi mekem hemia i fokas blong mi, i helpem mi blong fogiv. Hemia i helpem mi blong luk ova ol nogud tritmen ia mo luksave se, mi stap ia from wan bigfala stamba tingting. Se, mi stap ia blong kasem ol blesing mo hop se mi stap olsem wan blesing long ol narawan. Blong no letem ol samting ia oli stap blokem mi be i wan nara step blong progres blong mi. From hemia, taem mi prea mo dipen long Lod, mi faenem paoa blong lego—blong lego ol harem nogud ia, o blong holem kros we i stap traem blong fidim spirit blong mi—be blong letem Lod i givhan mo i mekem mi kam strong moa mo stap fetful blong muv i go fored.

Ol sista, Hem i save yufala. Lod i save gud yu mo Hem i kea long yu. Hem i save nem blong yu, Hem i save soa hat blong yu, Hem i save ol glad blong yu mo Hem i wantem blong lavem yu. Hem i wantem yu blong letem Hem i kam long laef blong yu. Hem i save ol hadtaem we i stap wetem yu. Hem i lavem yu mo wantem yu blong filim lav ia we i kam tru long Hem. Hem i wan neiba, wan sista o wan fren we i stap givim ol blesing blong givhan mo sapot ia. Letem oli kam. Letem oli raonem yu wetem han blong lav blong olgeta tru long seves blong olgeta.