Yumi Evriwan I Kasem Blesing From Paoa mo Fet blong Ol woman

Ol dia sista, mi glad tumas blong stap pat long naesfala iven ia blong Rilif Sosaeti. Mi talem tangkyu from evri samting we i bin hapen bifo kam kasem naoia. Mi laekem mesej we Presiden Camille N. Johnson, Sista J. Anette Dennis, mo Sista Kristin M. Yee i bin givim.

Mi mi bles blong gat ol gudfala woman olsem long laef blong mi, mo bae mi oltaem talem tangkyu from bigfala jenis we oli mekem long laef blong mi. I nogat wan stret toktok blong tokbaot hamas mi talem tangkyu long olgeta. Oli bin lukaotem wanem we i gud long evri wei long laef blong olgeta be oli tokbaot moa filing mo fasin blong tangkyu from lav blong God long laef blong olgeta.

Waef blong mi Mary, i eksampol blong hemia mo hem i traem blong laef folem “wan hapi mo gud laef nomata long ol nogud situesen.”

Mi filim wan bigfala responsabiliti taem mi stap toktok long yufala ol gudfala woman. Yufala i gat wan spesel ples long hat blong mi mo mi luksave yufala from huia yufala mo komitmen blong yufala i go long Lod mo long Jos blong Hem long wol ia we i had.

Ol dia sista plis yufala i no tingdaon long paoa we yufala i gat blong mekem, lavem, mo fasin ia blong jenisim olgeta we yufala i stap raon long olgeta. Bae yu blesem plante sapos yu stap traehad blong laef folem fasin ia blong Kraes.

Samtaem, folem hat we i wantem folem Jisas Kraes mo mekem gud samting, yu save filim se nomata yu wok had olsem o wanem we yu mekem, hem i no inaf. Samtaem, nomata we i tru se evriwan oli filim se yu yu bin “mekem gud,” be yu yu maet filim se yu no bin mekem i gud inaf. Yet gudfala wok we yu mekem, kaen fasin we yu soem, mo lav we yu soem oli ol blesing we i moa bigwan long olgeta we oli bin gat janis blong konek wetem yu mo hemia i inaf!

Yumi stap laef long wan taem we i mufmuf tumas. Wol i fulap wetem plante noes. Plante long ol jalens oli long saed blong spirit we ae i no save luksave. Oli ol sosol problem we yumi olsem wanwan man o woman i no save stretem be hem i abaot yumi. Blong winim ol pipol blong jusum stret fasin i wan jalenj we i gogohed. Oltaem i gat “fasin blong go agens long evri samting.” Wanem we i defren tedei i we “bigfala bilding we i gat fulap spes” i fulap wetem fasin blong gat tu tingting, mo fasin blong raorao, krietem moa problem bitim eni taem long laef blong mi.

Wanem we i tru i we ol kaen jalenj ia i stap oltaem. Wan yia bifo Jos Ia blong Jisas Kraes blong Ol Lata-dei Sent i oganaes, Profet Josef Smit i stap transletem Buk blong Momon. Lod i soem long Josef mo Olvia Kawdri wanem we i stap naoia long seksen 6 blong Doktrin mo Ol Kavenan. Seksen ia i holem ol kaonsel blong ol had taem.

Lod i kamfotem tufala, “no fraet; mekem gud; letem wol mo hel i kam wan agensem yufala, from we sapos yufala i stanap antap long strong ston blong mi, bambae oli no save win.” Hem i givim kaonsel tu long tufala, “Lukluk long mi long evri tingting blong yutufala; no gat tu tingting, no fraet. … stap fetful, stap obei long ol komanmen blong mi mo bambae yutufala i save kasem kingdom blong heven. Amen.”

Luklukbak long ol Sent bifo, ol hadtaem blong olgeta i tajem yumi bigwan taem oli stap strong mo eksampol we oli soem blong luksave lav blong God mo givhan long wanwan long olgeta.

Baptaes i wan gud stat blong luklukbak long laef mo komitmen blong yumi long gospel blong Jisas Kraes.

Blong plante long yumi, be i no ol niu konvet mo olgeta we oli yang, baptaes blong yumi i hapen plante yia i pas. Bigfala profet Alma i bin askem strong long yumi taem hem i talem, “Mo nao luk, mi talem long yufala, … sapos yufala i bin gotru long wan jenis long hat, mo sapos yufala i bin filim blong singim singsing blong lav blong pemaot man, bae mi askem: ?yufala i save filim samting ia naoia?”

Alma i gohed wetem wan mesej we i stret gud long dei blong yumi tedei. Hem i askem Ol Sent, “?Sapos oli singaotem blong oli ded, bae oli rere blong mitim God?” Alma i tokbaot afta, fo kwaliti we blong wan i no save gat mak long fored blong God.

Faswan, ?yumi putum tingting blong yumi i stap daon inaf? Long wan wei, hemia i gobak long wanem we blong kasem baptaes yu nidim hemia, blong putum tingting blong yumiwan daon mo hat we i fulap wetem sore mo spirit blong wantem sakem sin.

Nambatu, ?yumi sakemaot hae tingting blong yum? Tokbaot hae tingting, Alma i givim kaonsel agensem fasin blong tekem Tabu Wan i nating andanit long ol leg blong yumi mo kam solap long hae tingting, putum ol hat blong yumi long samting blong wol ia we i nating mo long ol rij samting, gat tingting ia se yumi moa gud bitim wan narawan, tingdaon long olgeta we oli putum tingting i stap daon.

Nambatri, ?yumi karemaot fasin blong jalus ia long yumi? Blong olgeta we oli gat ol bigfala blesing be oli no glad from se oli lukluk nomo long wanem we ol narawan oli gat, fasin blong jalus i save spolem gud yu. Fasin blong jalus i kam antap we evriwan i tokbaot mo ol rij samting i tekem ples blong fet mo famli, olsem wan impoten samting we i givim hop long fulap sosaeti.

Nambafo, ?yumi stap jikim o abiusum wan brata o sista? Long wol tedei, yumi luk hemia i fulap long sosol media.

?I gat eni samting we i moa gud mo stret long ol isiu we i stap tedei bitim mesej ia blong hae tingting, fasin blong jalus, mo fasin blong abius?

Bigfala faet raon long wol hem i abaot ol samting long saed blong laef, ol isiu blong ekonomik blong tedei. Yet, oli tokbaot smol nomo abaot fasin blong gobak long fasin olsem hemia blong Kraes we i lukluk moa long ol prinsipol blong stap rere blong mitim God, mo kondisen blong spirit blong yumi. Yumi nidim blong lukluk moa long laef blong yumi mo lukluk moa long impoten samting long saed blong spirit.

Mi kasem insperesen oltaem taem mi luklukbak long ol iven we i lid i go long dedikesen blong Nauvo Tempol. Mi bin sapraes long fet blong ol sista. Strong filing we i kam hem i tru long fet blong ol sista. Fet blong olgeta long gospel blong Jisas Kraes we i kambak mo Profet blong Restoresen, Josef Smit, i bigwan tumas.

Ol woman ia we oli givim taem blong olgeta oli soem fet blong olgeta long hamas endaomen mo tempol siling i impoten we i blong oltaem tru long ol sakrifaes we oli bin wiling blong mekem. Oli sakrifaesem taem blong olgeta mo ol smol samting we oli gat. Mo tu, tru long asaenmen, oli bin mekem fas odinens wok insaed long Naovu tempol. Taem oli stap help mekem rere Ol Sent blong lego Naovu, plante sista oli putum wan rekod blong stap help wetem ol tempol odinens long evri dei mo afta oli kuk mo wash plante taem long naet. Be, oli mekem i klia se fet mo save we oli kasem long tempol i mekem olgeta oli glad taem oli stap muv i go long ol wael ples we oli no save.

Long histri, ol woman oli gat bigfala responsabiliti long hom mo wetem ol pikinini, mo olsem ia nao i gat tingting ia blong gat sekiuriti mo fasin blong no muvmuv. Fet blong ol sista blong wiling blong lego Nauvo i go long wan ples we oli no save i wan insperesen.

Sista Bethsheba Smit i rekodem ol filing blong hem, taem hem i rere blong aot i go, i wan stori we i tajem hat. Hem i eksperiensem taem ol rabis man oli ronemaot Ol Sent long Misuri mo taem we hem i bin stap long ded blong Aposol David W. Patten. Taem hem i stap go tru long ol taem ia blong muv aot long Nauvo, hem i raetem:

“Las aksen blong mi long naesfala ples ia i blong klinim ol rum, brum gud ol floa, mo putum gud brum long stret ples blong hem bihaen long doa. Afta wetem filing blong sore long hat blong mi … , mi sarem gud doa mo fesem wan fiuja we mi no save, … fesem wetem fet long God mo i no wetem smol hop se gospel bae i stanap long Wes mo i tru, mi bin filim semmak bifo long Misuri blong stap strong long ol prinsipol ia.”

Sista Smith i bin raetem stori blong taem ia we ol sent oli pua, sik, mo hadtaem blong nogat kakai we ol Sent oli bin safa from taem oli stap mekem wei blong olgeta i go long wes. Long Maj 1847, mama blong hem i ded, mo nekis manis afta nambatu boe blong hem John i bon. Rekod blong hem abaot hemia i sot nomo, “Hem i las pikinini blong mi, mo hem i laef blong fo aoa nomo.”

Samtaem afta long laef blong hem, hem i bin kam wan metron long Sol Lek Tempol, mo namba fo presiden long Jeneral Rilif Sosaeti.

Sapos wan i tokbaot ol impoten fasin blong ol sista paeonia blong yumi, hem i fet blong olgeta long Lod, Jisas Kraes we i no muvmuv.

Mi ting se ol woman long Jos tedei oli strong mo fetful semmak. Blong luk tru long wan klia ae, fet i fasin ia blong soem lav mo tangkyu i go long Sevya. From tru long atoning sakrifaes blong Hem, harem nogud i no en mo evri sin Hem i save fiksim. Taem yumi putum fet blong yumi long Jisas Kraes mo stap long kavenan rod, yumi save kasem ol gol blong yumi we i no save finis.

Ol kondiesen long wol tedei oli dipen bigwan long fasin blong jenis blong wanwan man mo woman blong mekem fet i kam strong moa long Papa long Heven mo Jisas Kraes mo Atonmen blong Hem. Doktrin blong Jos mo ol skripja oli givim insperesen blong rod map blong helpem yu blong mekem ol stret mo gud joes. Profet blong Lod, Presiden Dallin H. Oaks, i givim wan stret gaed blong dei blong yumi. Lod i mekem yumi rere blong folem tijing folem tijing, from nogud taem ia we yumi stap fesem.

Nomata ol tes blong yumi, wetem plante gaed long saed blong spirit tedei, bae i no stret sapos yumi no tangkyu from ol blesing blong yumi.

Tangkyu blong stap olsem huia yu mo mekem wanem we yu mekem. Mi mi witnes long yu se Jisas Kraes i Sevya mo Ridima blong wol. Hem i laef mo stap givim lav mo gaed we yumi nidim blong kobak long Hem. Mi testifae olsem long nem blong Jisas Kraes, amen.