Help We I Kam long Jisas Kraes

Welkam ol dia sista, long selebresen ia blong taem we wok blong Rilif Sosaeti i bin stat.

Naesfala peinting ia we i kam long Michael Malm, we i ripresentem ol woman, ol man, ol pikinini mo ol yang pipol—we oli kam long ol defren kantri, defren kalja mo defren taem—mo oli stap kam long Sevya blong yumi, Jisas Kraes. Hemia i wok blong Rilif Sosaeti: blong mekem i kam moa gud fasin blong stap wan disaepol blong Jisas Kraes mo rere blong gobak long ples we papa mo mama blong yumi long heven i stap long hem.

Yufala ol sista blong mifala. Mo mifala ol sista blong yufala.

Long stat blong divosen ia, oli bin introdiusum long yufala Rilif Sosaeti Jeneral Advaesa Kaonsel. Oli bin singaotem olgeta mo setemapat olgeta blong oli givim advaes mo kaonsel wetem mifala blong lidim ol sista blong Rilif Sosaeti. Olsem yufala, olgeta oli ol woman blong bigfala fet—speseli taem oli fesem ol hadtaem blong laef, long wol ia. Long yia ia, yu bin gat janis blong kasem insperesen tru long olgeta, long taem blong wan vidio storian we oli bin rilisim wetem brodkas ia.

Raon long wol, i gat moa long eit milian woman we oli pat long RIlif Sosaeti. Blong stap givim mo kasem help long tugeta temperol mo spirituol, yumi stap kam moa klosap long Jisas Kraes mo kam moa olsem Hem.

Mifala i prea se Spirit bae i stap wetem yu taem yu lisin long ol mesej blong mifala. Mifala i rere ol mesej ia mo pikjarem yu long maen blong mifala. Afta, bae yumi gat spesel janis blong harem Elda Quentin L. Cook, wan memba blong Kworom blong Olgeta Twelef Aposol. Mifala i lavem yufala ol dia woman long gospel blong Jisas Kraes. Yufala i ol sista blong mifala.