Sakrifaes blong Jisas Kraes i bin mo i blong Yu

Ol dia sista, mi glad tumas blong stap wetem yufala oltaem. Nomata fes tu fes o long spirit, fasin blong yu blong stap fetful mo stap stret mo gud, i tajem hat mo givim insperesen long mi. Blesem yu blong stap karem lav mo kamfot blong Sevya i go long olgeta raon long yu. Mifala i lavem yu mo mifala i prea from yu.

Sam yia i pas, mi bin visitim wan neseri klas. Neseri lida i bin aot long dei ia mo mi luksave se i no gat wan lesen we oli priperem. Mi lukluk long kapod mo faenem wan lesenbuk mo jusum wan lesen abaot lav blong God. Hem i gat wan pikja blong ol pikinini raon long wol we oli ripresesentem lav blong God long evriwan. Mi askem ol smol neseri klas abaot hao lav blong God i save kasem olgeta evriwan. Wan long ol smol boe we i fulap long eneji we nem blong hem Charlie, i leftemap han blong hem mo talemaot se, “!lav blong God i BIGWAN!” I tru tumas, Charlie. Yes, lav blong God i “bigwan.” Lav blong Hem “i kam long [yumi] taem yumi lukaotem Hem” mo hemia i gogohed long wanwan long ol pikinini blong Hem. I no gat wan we i no save kasem lav blong Hem. Olsem we Aposol Pol i bin tijim:

“Mi mi save finis we i no gat wan samting nating we i save tekemaot yumi long Kraes we hem i lavem yumi tumas. Bambae yumi ded, be hemia i no save tekemaot yumi, mo laef blong yumi i no save mekem. I no gat sam enjel, no sam haeman, no sam narafala paoa long heven we i save mekem. I no gat wan samting we i stap finis, no wan samting we bambae i kam, we i save mekem,

“I no gat samting long ples blong God, mo i no gat samting long Hom blong ol Dedman, we i save tekemaot yumi long hem. I no gat wan samting nating long olgeta samting we God i mekem, we i save tekemaot yumi long God, we hem i lavem yumi ya tumas, we yumi joen long Jisas Kraes, Masta* blong yumi.”

Bigfala lav blong God i kamaot tru long presen blong sore, we i Pikinini blong Hem, Jisas Kraes. Ol kavenan blong yumi oli joenem yumi i go long Hem mo paoa blong Atonmen blong Hem. Tru long Hem, yumi save sakem sin mo jenis. Tru long Hem, yumi save kam moa strong mo kasem paoa we i bitim blong yumiwan. Tru long Hem, yumi save faenem tabu pis mo hop ia se “evri samting bae i kam oraet.”

Jisas Kraes i kam blong help, karemaot ol hevi samting mo karemaot wanem we yumi no save karem mo hemia we yumi no sud karem long yumiwan. Bae mi serem wan eksampol abaot miwan.

Samtaem i pas, mi faenemaot se mi gat wan jalenj we i stap traem mi, we i mekem se mi wari tumas mo mi filim se mi no impoten. Situesen ia i stat blong distebem ol tingting mo paoa blong mi. Mi stap tingting se, from wanem hemia i mekem mi wari tumas. Mi traem blong stap help, stap kaen, toktok klia, be hemia i no mekem eni jenis nomo. Mi filim tingting i fasfas mo mi wantem tumas blong kasem help mo pis.

Long medel blong hadtaem blong mi, mi nildaon long saed blong bed blong mi long wan naet, mo stat blong prea long Papa blong mi long Heven. Mi nomo save tekem hemia. Wota blong ae i folfoldaon mo mi talem, “Mi nomo save tekem hemia, i tumas long mi, mi nidim help mo sapot blong Yu. ?Bae Yu save tekem hemia, plis? Mi givim hemia long yu. Plis helpem mi.” Mi askem help tru long sore blong Pikinini blong Hem. Mi tingbaot se long taem ia we Jisas Kraes i bin safa from mi mo tekemaot ol harem nogud blong mi, mo we tru long Hem, hevi samting ia, bae i save kamaot. Mi filim wan hop we i kam kwiktaem, semmak long eksperiens blong yangfala Alma , i talem, “Nao, taem we tingting blong mi i fas long tingting ia, mi bin prea insaed long hat blong mi: Jisas, yu yu Pikinini blong God, gat sore long mi, mi we mi stap long konkon rabis ples.”

Long nekis dei, mi stat blong filim wan pis we i tekemples blong harem nogud. Wan pis we i tru mo bitim andastaning blong mi. Wan pis we i talem se, situesen ia i stap long han blong Papa mo Pikinini mo i no blong mi blong tekem. Taem mi jusum blong putum tras blong mi long Tufala, mi filim lav mo help blong Tufala, mo Tufala i lidim mi blong save olsem wanem blong kasem sapot we mi nidim.

Wan niu wei we i moa gud abaot hao mi luk situesen blong mi, i kam long ol filing mo maen blong mi, long ol dei mo wik we i stap kam. Mi no luksave se niufala wei ia i moa klosap long hao God i handelem ol situesen, bae hem i wan presen we i givim paoa blong stap winim ol hadtaem we yumi fesem. Hemia i help blong putum situesen ia i go long stret ples blong hem. I kam olsem we Lod i tokbaot se, “yu wantem tumas wanem we i smol tumas” komperem wetem “mo yu no tingting nating long ol samting we oli moa impoten.”

Ol had situesen oli no finis, be hemia i no mekem mi harem nogud long semmak wei olsem bifo mo ol situesen ia oli nomo stap distebem ol tingting blong mi. I tru, hem i wan merikel. Hem nomo i save tekemaot wanem we i hevi long wan, i kam “laet.”

Long medel blong stap kasem help, mi ridim skripja ia we i kam long profet Sinos, we i tokbaot eksperiens blong mi: “Mo yu yu bin harem mi from ol hadtaem blong mi mo truhat blong mi; mo hem i from Pikinini blong yu, we yu yu … gat sore olsem ia nao long mi, from hemia, bae mi prea long yu long ol hadtaem blong mi, from long yu, glad blong mi i stap long hem; from yu yu bin tanem ol jajmen blong yu oli gowe long mi, from Pikinini blong yu.”

Ol sista, letem yumi jusum blong biliv long Jisas Kraes mo askem help we yumi nidim tru long paoa blong Atonmen blong Hem. Wanwan taem bae yumi luk se yumi stap long “otomatik” paten, we i nomol blong yumi bilivim se God bae u helpem yumi, be yumi no askem Hem wetem tru fet, mo stap jusum blong bilivim se, rili bae Hem i save helpem yumi. Mi ting se, Papa blong yumi long Heven i stap hop se yu mo mi, bae yumitu askem help ia we yumitu nidim wetem tru hat mo wetem fet se sakrifaes blong Jisas Kraes i bin hapen blongYU. Atonmen blong Hem, safaring soa blong Hem i bin hapen mo i blong yu. Hem i lavem yu mo wantem tumas blong hilim mo blesem yu wetem help we yu nidim, naoia mo blong oltaem. Mo Hem i gat paoa blong mekem hemia taem yumi eksesaesem fet blong yumi blong laef folem ol kavenan blong yumi mo jusum blong biliv long Hem.

Presiden Dallin H. Oaks i bin tijim se: “From eksperiens blong Hem we i pemaot man taem Hem i stap long wol ia, Sevya blong yumi i save givim kamfot, hilim, mo mekem evri man mo woman long eni ples i kam strong moa, be mi biliv se Hem i mekem olsem nomo long olgeta we oli lukaotem Hem moaskem help blong Hem. … Yumi kwalifae from blesing ia taem yumi biliv long Hem mo prea from help blong Hem.”

Papa long Heven i no wantem yumi blong go tru ol jalenj mo ol harem nogud blong yumi, yumiwan. Hem i givim wan Sevya long yumi, Wan ia we tabu paoa, lav mo help blong Hem i blong yumi wanwan. Hem i wantem blong samting i kam oraet mo karemaot harem nogud blong wan sol.

?Yu save harem Hem i stap toktok long yu olsem we Hem i bin toktok long ol pipol blong Alma long taem blong ol hadtaem blong olgeta?

“Leftemap hed blong yufala mo yufala i glad, from mi save kavenan we yufala i bin mekem wetem mi; mo bae mi mekem kavenan wetem ol pipol blong mi mo mekem olgeta oli go fri, oli aot long fasin blong stap slef.

“Mo tu, bae mi mekem ol hevi samting … long solda blong yufala i nomo hevi, mekem se bae yufala i no save filim long ol bak blong yufala, iven long taem ia we yufala i stap olsem slef; mo hemia bae mi mekem, blong mekem se yufala i save stanap olsem ol witnes blong mi long fiuja, mo blong mekem se yufala i save gud se mi, Lod God, mi visitim ol pipol blong mi long ol hadtaem blong olgeta.”

Taetol blong peinting we mi bin serem long mesej blong mi long las jeneral konfrens, “Mo Mi Dring.” We i kam long toktok blong Sevya Hemwan, long Doktrin mo Ol Kavenan taem Hem i tokbaot harem nogud blong Hem long Getsemani:

“We safaring ia i mekem mi, we mi God, we mi hae long evriwan, mi seksek from soa long bodi, mo blad blong mi i ronaot long evri hol blong skin …

“Be, glori i go long Papa, mo mi dring mo mi finisim wok blong mi blong mekem rere evri samting blong gud blong ol pikinini blong ol man.”

Seyva i dring long konkon kap blong mekem se yumi save sakem sin mo kam klin aot long sin. Hem i dring long konkon kap blong mekem se yumi save kam moa strong, kasem help mo hiling. Hem i dring long konkon kap blong save karemaot ol hevi samting mo givim pis long yumi. Hem i dring long konkon kap blong mekem se yumi save gobak long ples we Papa i stap long hem wetem olgeta we yumi lavem blong oltaem. Hem i dring long konkon kap from lav we Hem i gat long yu mo mi.

Sloslo mining blong peinting ia i bin jenis from se, mi bin jenis. Rilesensip mo andastaning blong mi abaot Sevya mo wanem we Hem i bin mekem blong mi, i bin kam bigwan.

Hao yumi luk Hem long laef blong yumi, bae i jenis taem yumi jusum blong biliv long Hem, lan abaot Hem, sakem sin mo letem tru mining blong Atonmen blong Hem i givhan long evri pat blong laef blong yumi.

Mi save Papa long Heven mo Sevya, Tufala i lavem yu. Mi save se Jisas Kraes i stap laef; Hem i Ridima blong wol. Atonmen blong Hem i blong yu. Letem yumi askem wetem fet long wanem yumi nidim mo afta, “stanap strong [blong] bambae yufala i luk ol samting we Hae God bambae i mekem blong sevem yumi,” hemia i prea blong mi. Long nem blong Jisas Kraes.