Lav mo Laet blong God I Stap Oltaem, I no Jenis mo I No Muvmuv

Ol dia sista blong mi, long wea ples yufala i stap long hem long wol ia, plis, save se mifala i lavem yufala mo Papa blong yufala long Heven mo Sevya blong yufala i lavem yufala. Mi save se samtaem bae i hat blong filim lav blong Tufala. Mi bin gat ol taem olsem ia tu miwan. Be mi testifae long yufala se lav blong Tufala long yufala i neva jenis. I stap oltaem iven long ol hadtaem blong laef blong yu we taem i had blong filim.

!I tru! Plante long yumi, yumi lavem ol naesfala dei we san i saen. Ol kala blong neja oli gud tumas taem we san i saen. Long ol taem we i kolkol, yumi laekem blong filim san i saen long ol fes bong yumi. I fulumap yumi wetem laet mo i wom. Be, afta, i gat ol taem we ples i no klia tumas, i ren, mo ol taem we i tudak mo yumi no save luk san o filim wom blong san mo evri kala ia oli no pulum tingting mo i nogat intres. Long ol taem ia we ples i no klia tumas o taem blong strong win o long naet we i tudak, ?i tru se yumi gat tu tingting se bae i gat san? ?Yumi fraet se san bae i nomo saen bakegen? !Hemia i no tru! Yumi save se taem strong win o naet i en, taem klaod i nomo gat, bae yumi save luk mo filim bakegen wom blong san we i gud tumas. San i stap oltaem, i no jenis mo i no muvmuv. Hem i stap oltaem.

Hem ia i wan stori we i gat valiu blong komperem long laet mo lav blong Sevya long yumi. Laet blong Hem i givim kala mo mining long evri samting long laef blong yumi. Lav blong Hem i womem sol blong yumi mo i givim yumi hop blong fiuja. Be olsem we ples i no klia tumas, i gat strong win mo ol taem we i tudak we yumi no save luk san, truaot long laef blong yumi long wol ia, bae i gat tu ol taem we ples i no klia gud, strong win mo ol taem we i tudak we bae i hat blong save filim lav blong Sevya long yumi mo luk laet blong Hem. Bae i gat ol taem we yumi filim se Papa blong yumi long Heven mo Sevya blong yumi tufala i no stap long laef blong yumi, mo yumi filim bigfala fraet se Tufala i lego yumi, se Tufala i no lavem yumi, mo se yumi stap yumiwan. Iven Josef Smet mo Sevya Hemwan i bin eksperensem filing ia se God i bin lego tufala.

Be, ol sista blong mi, mi serem witnes blong mi long yufala se i nogat wan samting i save seraotem yumi long lav blong Papa blong yumi long Heven mo Jisas Kraes! Laet mo lav blong Tufala i stap oltaem, i no jenis mo i no muvmuv, i semmak olsem laet blong san we i wom. Yumi no nid blong fraet se Tufala i lego yumi from se bae Tufala i neva mekem olsem. Hemia i no fasin blong Tufala blong mekem olsem.

Mi save tingbaot we mi filim se mi stap miwan taem mi muv i go long mexico afta we mi mo hasban blong mi i bin mared. Hemia i fastaem long laef blong mi, we mi bin stap longwe long hom mo famli blong mi. Mi no andastanem mo no save toktok gud lanwis yet, mi stap luk fored from fas bebe blong mitufala, mo hasban blong mi i stap go long wok mo skul evri taem. Mi tingbaot filing ia blong harem nogud se mi stap miwan, mi lus mo mi fraet. Mi gat wan trabol blong filim se Papa blong mi long Heven i save long mi. Mi no save filim laet mo wom filing blong lav blong Sevya blong mi. Mi stat blong gat filing ia blong tudak, nogat tras mo lusum hop.

Be sam long ol sista blong Rilif Sosaeti blong mi oli kam savem mi. Oli putum ol han blong olgeta raonem mi mo helpem mi blong filim se mi no stap miwan. Oli givim ol toktok we i leftemap mo sapotem mi tru long ol smael, lukluk we i kaen mo lav we i stret evriwan, iven se mi no save andastanem ol toktok blong olgeta mo oli no save andastanem mi. Be from se mi save filim lav blong olgeta mo se oli akseptem mi, hemia i seraotem ol klaod blong tudak we mi stap filim, mo mi stat blong filim bakegen lav mo sapot blong Papa long Heven long mi.

Ol sista, yumi save mekem hemia long wanwan long yumi. Yumi evriwan i ol pikinini gel blong papa mo mama long heven, mo yumi nidim wanwan long yumi. Nomata wea ples yu stap, nomata long wanwan situesen blong yumi, yumi no mas gat filing ia se yumi stap yumi wan o stap longwe. I gat ol brata mo sista blong yumi long saed blong spirit we oli stap raonem yumi. Yumi evriwan i bin kam long wol ia tugeta long taem ia, mo yumi nidim wanwan long yumi. Temtesen blong stap komperem mo jajem wanwan man i kam long enemi. Hem i wantem blong seraotem yumi from Hem i save abaot bigfala paoa we i kam taem yumi filim lav, stap wan mo stap sapotem wanwan long yumi. Yumi save helpem wanwan long yumi blong filim lav blong Sevya taem yumi traehad blong stap wan olsem ol pikinini gel blong God. Letem yumi joenem ol han, leftemap wanwan long yumi mo wokbaot i go hom tugeta.

Mi bilif se Papa blong yumi long Heven mo Sevya blong yumi Tufala i oltaem sendem ol mesej blong lav mo sapot, be plante taem yumi no luksave ol mesej ia from se maet yumi no stap lukaotem olgeta. Blong lukluk wan smol pidjin i hang o flae aotsaed long windo blong mi, witnesem wan naesfala sanset, o blong luksave evri neja we i naes nomo oltaem i helpem mi blong filim lav blong Tufala. Taem ol samting oli had mo mi filim nogud, samtaem mi luksave ol mesej blong lav mo sapot blong Tufala tru long wan spesifik ves long skripja we i tajem hat blong mi taem mi ridim, o long wan storian wetem wan man we i givim insperesen, o wan samting we mi bin filim taem mi stap lisen long ol naesfala toktok blong wan hymn o wan singsing we i leftemap mi.

Mi laekem ol toktok blong wan long ol niu hymn blong yumi: “Ae blong Hem i stap long Smol Pidjin.” Fas ves i talem se:

Mi serem testimoni blong mi long yufala se ae blong Hem i no stap nomo long ol smolfala pidjin ia be i stap long wanwan mo evriwan long yufala. Yu yu wan pikininini gel blong God we Hem i lavem tumas, mo mi testifae se bae Hem i no save fogetem yu. Hem i save yu, i lavem yu, mo voes blong yu iimpoten, speseli long Papa blong yu long Heven mo long Stret Pikinini blong Hem we Hem i lavem tumas. Tufala i andastanem gud ol soa mo harem nogud blong yu, wota blong ae blong yu, ol harem nogud blong yu mo ol pein blong yu. Papa blong yu long Heven we i lavem yu i oltaem harem ol prea blong yu.

Laef long wol ia i fulap wetem ol jalenj mo ol hataem, wetem plante we oli lusum ol fren o olgeta we oli lavem, long saed blong bodi o maen, long saed blong faenans, mo iven oli nomo gat karej mo tras. Mi laekem wanem we Elda Josef B. Wirthlin i talem abaot wanem yu lusum: “Lod bae givim bak long olgeta we oli stap fetful evri samting we oli bin lusum. Hemia we oli tekemaot long olgeta we oli lavem Lod bambae oli ademap long olgeta long wei blong Hem. Bae i no kam long taem we yu yu wantem, olgeta we oli fetful bae oli save se evri wota blong ae tete bae i kambak wan handred taem moa wetem ol wota blong ae blong glad mo tangkyu.”

Mo Profet Josef smit i talem, “Evri samting we yu bin lusum bae oli blong yu long taem blong laef bakegen long ded, bae oli provaedem long yu blong gohed blong stap fetful. Long wan visen we i kam long Hae God, mi bin luk.”

Mi testifae se from Sevya blong yumi mo atonemen mo sakrifaes blong Hem, ol promes ia oli tru. Sapos yu stap fetful long God, evri samting we yu yu lusum bae yu kasem bakegen, mo bae wota blong ae i ron wetem glad mo tangkyu long Papa blong yu long Heven from we Hem i givimbak ol blesing ia.

Ves ia insaed long buk blong Revelesen, plante taem i givim mi kamfot mo i helpem mi filim lav blong God, “Hem bambae i ravemaot wota blong ae blong olgeta. Nao bambae i nomo gat man i ded, mo bambae man i nomo krae from man we i ded. Bambae i nomo gat man i krae, mo bambae man i nomo harem nogud long bodi blong hem. Ol samting ia blong bifo oli lus olgeta.” Tingbaot tu promes ia : “God i stap mekem long olgeta samting we oli stap kamtru long laef blong yumi, blong mekem i gud long yumi ia we yumi lavem hem.” !Ol toktok ia i naes mo i givim kamfot! Jisas Kraes i laet mo laef blong wol ia, mo Hem i promes se taem yumi folem Hem, bambae yumi no save wokbaot long tudak.

Mi testifae long yufala se Papa blong yufala long Heven mo Sevya blong yufala bambae Tufala i neva fogetem yufala, nomata long huia yufala, nomata wea ples yu stap, nomata long situesen we yu stap fesem naia, mo nomata long fasin blong yu bifo. Laet mo lav blong Tufala i stap oltaem, i no jenis mo i no muvmuv. Mo taem ol klaod mo strong win long laef blong yu i lus, bae yu save se Tufala i stap oltaem wetem yu, iven long ol hadtaem long laef blong yu. Long nem blong Jisas Kraes, amen.