Faenem Paoa mo Spel long Jisas Kraes: Hannah Miller

Sista blong mi i ringim mi se mi nid blong go hom blong mi save luk papa blong mi bifo hem i ded. Famli blong mifala i kam klosap long dei blong livim kakae from wan merikel, mo stret afta we mifala i kam long en blong livim kakae, mifala i talem tata long papa blong mi, mo kwiktaem nomo hem i ded. Mo long taem ia, mi bin save se merikel ia i bin spel ia we hem i nidim aot long sik mo ol jalenj blong wol ia. Mo mi tingbaot harem nogud we i fulumap famli blong mifala. Be Lod i bin kwik blong givim spel long mifala. Plante taem tru long ol dia fren mo famli we oli givim bigfala kamfot mo kipim kampani long taem ia we i had, ol taem we i had blong mifala.

Mo taem mi stap tingbaot eksperiens ia, mi stadi—mi stap stadi wan skripja insaed long Buk blong Momon. Hem i ol toktok blong Momon, mo ves 17 mo 18, i tokbaot King Benjamin, we i gat wan bigfala wok blong putum pis insaed long wan sosaeti. Mo mi laekem tumas wanem hem i talem. Hem i se, “King Benjamin i bin wan tabu man, mo hemi bin rulum ol pipol blong hem wetem stret mo gud fasin; mo i bin gat plante tabu man long graon.” Mo samtaem afta hem i se, “Wetem help blong olgeta ia, king Benjamin, taem hem i bin wok wetem ful paoa blong bodi blong hem mo paoa blong ful sol blong hem, mo tu ol profet i bin stanemap pis long graon wan moa taem bakegen.”

Mo mi tingbaot ol toktok ia “wetem help blong olgeta ia” mo plante taem we mi gat ol jalenj ia long laef blong mi, mi no save mekem nomo sapos mi no gat ol tabu man mo woman we oli stap blong sidaon long saed blong mi, krae wetem mi, kamfotem mi taem yumi stap olsem ol witnes blong God. Samtaem yumi filim se prea blong yumi i kwaet. Oli filim olsem se i no gat ansa, ating Lod tu i no bin harem. Be mi wantem serem testemoni blong mi se Lod i harem mo ansarem ol prea ia long wan wei we i stret gud evriwan. From Lod i kea abaot yu, Hem i kea abaot ol prea blong yu, Hem i kea abaot ol samting we yu stap karem long maen mo hat blong yu, Hem i kea abaot wanem i mekem yu wekap long naet. Mo ol ansa ia bae i kam. Bae oli kam.