Bildimap Fasin blong Stanap Strong long Saed blong Ol Filing: Mitzi Semo

Taem mi wan yang mama, fasbon pikinini boe blong mitufala i bin gat wan yia, mi kasem wan fon kol long wok blong hasban blong mi taem mi stap long wok. Mo oli talem, “Hasban blong yu i kasem wan bigfala kil. Mifala i wantem yu blong go long hospital naoia.” Mo mi tingbaot taem mi stap go insaed long trak mo traem blong statem, be mi luksave se mi stap seksek tumas. Mi no ting se bae mi wari tumas olsem. Mo mi sidaon ia mo mi mas mekem wan prea nomo. Afta, mi kasem wan filing blong pis mo wan gudfala filing we i kavremap mi, mo mi save se evri samting bae i oraet. Taem mi kasem hospital mo dokta i talem long mi, “Mifala i no save sapos hasban blong yu bae i kam oraet o no.” Mi tingbaot filing we mi bin kasem long trak mo i no olsem se Lod i stap talem long mi se, “Yu no wari hasban blong yu bae i kam helti olsem bifo nomo,” be mi save se bae mi oraet mo bae mitufala i kam oraet nomata wanem risal bae i kam.

Mo taem mi tingbaot blong gat fasin blong stanap strong long saed blong ol filing, mi tingting long pis we Sevya i givim long yu mo i helpem yu filim olsem. Nomata long wanem risal we bae i kamaot mo nomata long situesen naoia, yu save se Hem i stap ia mo bae i helpem yu go tru long evri samting ia. Mo hemia nao hao mi filim truaot long bigfala hadtaem ia. Mo i no bin isi. Mitufala i bin go tru wan yia blong plante had samting, tugeta long saed blong bodi mo spirit, be mitufala i bin go tru long hemia mo mitufala i lanem plante samting.

Bae mi save talem se, i no yumi evriwan, i gat ol semmak ekperiens long laef. Be mi save se blong mi, long tetaem ia, mi nidim blong tanem mi i go long Lod mo gat wan rilesensip wetem Hem. Mo taem mi mekem hemia, mi filim se bae mi save go tru long hemia. Mo afta, fasin blong mi blong stanap strong long saed blong ol filing blong mi, i stat blong develop antap long fandesen blong gospel blong Jisas Kraes. From hemia, long fiuja taem eni samting i hapen, mi tingbaot hemia.

Mo bae mi mas talem tu se evri Sandei taem mi tekem sakramen, pat ia we i se blong tingbaot Sevya, mi tingbaot eksperiens ia we mi gat wetem Hem. Mo hemia tu i bin bildimap fasin blong mi stanap strong long saed blong ol filing blong mi, from memori ia i helpem mi blong andastanem huia mi olsem wan pikinini blong God mo se, mi gat wan stamba tingting long ples ia mo mi stap ia blong helpem Hem bildimap kingdom blong Hem. From hemia, nomata se bae fiuja blong yumi bae i gud o nogud, yu save, wanem risal bae kamaot, mi save nomo se bae mi oltaem gat Sevya mo tanem mi i go long Hem. Mo mi bin trastem rilesensip ia mo ples ia nao i ples we fasin blong mi blong stanap strong long ol filing blong mi i kam long hem.