Faenemaot Tabu Plan we God I Gat blong Famli blong Mi: Andrea McConkie

Famli blong mi i no kam olsem wanem we mi mi tingting long hem. Mi lusum hasban blong mi sot taem afta we mitufala i bin mared mekem se, mi lukaot long famli blong mi olsem wan singgel paren. Mo mi save tingting ia se “i no kam olsem wanem we mi mi tingting long hem” from i no defren long tingting blong mi. I gat plante we oli gat problem wetem filing ia mo hemia i save mekem wan i harem nogud. Be i gat sam samting we mi bin lanem. I bin gat ol tru janis blong fulumap o tekemples blong ol defren filing ia we i blong luksave han blong God i stap givim sapot mo i stap givim mi paoa blong mekem ol samting we mi nid blong mekem we oli impoten mo we, mi wantem mekem i gud blong Hem.

I gat plante we oli kam blong help blong blokem ol tingting ia mo blong lavem mo givim lav blong God long yumi tru long seves mo tru nomo long fasin blong stap kaen, we hemia nao yumi nidim. Be wanem we mi rili lanem faswan i blong stap pat blong wan famli we i no save finis. Mi wan pikinini gel blong Papa long Heven, mo Hem i bin givim mi wan kavenan rilesensip mo sapos mi kipim mo mekem evri samting we mi save mekem blong mekem i kam moa strong, Hem bae i givim evri samting we mi nidim blong lukaot long famli blong mi, blong kam bes mama, blong lavem olgeta we oli pat blong famli blong miwan mo ol nara famli blong mi, ol famli blong God. Taem mi mekem kavenan rilesensip ia i kam moa strong, wanem we hemia i mekem i we, i helpem mi blong soem moa lav olsem we Hem bae i mekem. Mo blong save luksave lav blong God long laef blong yumi, i wan filing we i givim paoa—i wan presen we i givim paoa. Mo taem mi luksave hamas Papa long Heven i lavem mi, hamas Hem i gat fasin blong save wet longtaem wetem mi mo hamas Hem i wantem mi blong stap klosap long Hem, hemia i mekem ol famli rilesensip ia i gat moa mining, i spesel mo i impoten blong wok from.

Olsem we mi gat blesing ia blong gat wan save abaot God, lav blong Hem long mi, mi filim glad tu se mi save tijim lav blong Hem long olgeta we mi lukaot long olgeta mo olgeta we mi lavem. Hemia nao samting we i moa impoten we mi wantem wan blong save abaot mi i we, mi lavem Jisas Kraes. Mi save wan Papa long Heven we i gat lav i save gud mi. Hem i pat blong evri pat blong laef blong mi. Mo risen from wanem Hem i wantem mi pat long kavenan rilesenip wetem Hem mo blong mekem ol joes we i mekem mi blong kam olsem Tufala, i from se, Hem i wantem mi blong soem lav olsem we Hem bae i mekem. Hem i wan bigfala blesing blong save mekem hemia mo blong luksave han blong Hem long lav ia.