Bildimap Fasin blong Stanap Strong long Saed blong Ol Filing: Carolee Scowcroft

Mi rili filim olsem se mi stanap long solda blong ol bubu blong mi blong bifo. Ol stori blong olgeta i tajem hat blong mi. Mi gat bigfala bubuman we klosap i lusum sora blong hem fulwan from se, hem i fodaon aot long wan wilkat. Mo mama blong hem we i gat bigfala hop, i wasem mo i putumbak sora blong hem mo i bandejem. Mo wetem fet, sora ia i kam gud bakegen. Mo mi stap tingbaot fet mo ol prea we hem i stap mekem, yu save, long bihaf blong pikinini boe blong hem.

Afta, mi tingbaot wan bubuwoman i luk se hem i wan singgel mama, i stap wari tumas wetem ol fofala pikinini blong hem, mo i mas faenemaot hao blong givim sapot long olgeta. Yu save, i no gat wan we i stap givim eni mane long hem, mo hem i kam wan bisnes woman we i gat sakses mo i bin mekem plante long ol naesfala samting. From hemia, mi rili filim se paoa blong evri bubu blong mi bifo i mekem huia mi tedei—paoa blong olgeta ia i mekem se mi talem tangkyu tumas from ol blesing we mi gat.

Mo mi, olsem evriwan long yufala, mi bin fesem ol jalenj we i spolem ol filing blong mi. Mo mi bin lanem se ol jalenj—semmak olsem we Kraes nao i rod—ol jalenj oli plan ia nao. Mo sapos yumi luksave hemia, be i no blong stap faet agensem, lanem nomo hao blong stap glad from truaot mo talem tangkyu from ol jalenj ia, bae yumi kam moa hapi. Bae yumi save lanem hao blong helpem ol narawan taem oli go tru long ol jalenj.

Hemia tu wan nara samting we mi bin lanem se, hem i nomol blong wan i fesem wan jalenj afta narawan bakegen. Mo maet bae yu gat wan jalenj mo bae yu lanem ol samting aot long hem, mo hemia i givim janis long yu blong helpem wan narawan, we maet hem tu i fesem semmak jalenj olsem blong yu o wan we i defren be bae yu save andastanem hem moa long jalen ia from yu save.

Mi save se mi gat wan testemoni se, eni jalenj we yumi fesem bae Sevya i helpem yumi wetem. Nomata sapos hem i wan filing we i kam stret long Hem o tru wan wokman blong Hem—wan long ol Rilif Sosaeti sista blong yumi o wan pikinini boe o gel, o wan we i famli o fren blong yu, we oli kam mo givhan long yu long wan wei we i helpem yu blong go tru long eksperiens ia.