Alualu i Luma Faale-Aoaoga Faavae

Ia Tesema 1830, na poloaiina ai e se faaaliga tagata o le Ekalesia e “faapotopoto faatasi i le Ohaio” (Mataupu Faavae ma Feagaiga 37: 3). Mulimuli ane, i se konafesi sa faia i le Fale o Uitimera i Faiete, Niu Ioka, sa sailia ai e le Au Paia se faamaninoga faaopoopo i le poloaiga e faapotopoto. I le tali mai, na folafola mai ai e le Alii e faapea o Ohaio, o le a Ia tuuina atu ia i latou Lana tulafono ma o le a “faaeeina ai i latou i le mana mai luga” (Mataupu Faavae ma Feagaiga 38:32.).

Sosoo ai ma nei faaaliga, na faamautu ai le Ekalesia i matuisasa’e o Ohaio mai i a Fepuari 1831 i a Ianuari 1838 a o nonofo Iosefa Samita ma lona aiga i totonu ma faataamilo i Katelani. O le taimi lea o faaaliga, tuputupu a’e, suiga, manumalo, ma faalavelave a o tuputupu a’e Iosefa i lana matafaioi e le gata o se tali faaaliga ae o se taitai foi o le nuu ma se faufautua faaleagaga mo le Au Paia o Aso e Gata Ai. I lea lava taimi, na maua ai e Iosefa se numera taua o faaaliga lea na toefuataia le malamalama na leiloa i le umi o senituri o le liliuese. O nei faaaliga na suia le vaaiga a le Au Paia o Aso e Gata Ai i le lalolagi, le olaga pe a mavae le oti, ma le fuafuaga o le faaolataga a le Atua. O loo iai foi mea fou ia na toe faatonuina le vaaiga a Au Paia o Aso e Gata Ai i le foafoaga ma le Togiola a Iesu Keriso. Na tuleia i lenei tulaga le Au Paia e fausia faalapotopotoga ia e sailia tagata fou liliu mai, faamautinoa le saogalemu o alalafaga, faaitiitia le mativa, ma siitia tagata uma.

Na fatuina foi e nei faaaliga, suia, ma faalautele faatulagaga o pulega faale Ekalesia ma faalautele ai malamalamaaga o le mana ma faatulagaga o le perisitua. Sa latou valaauina foi le Au Paia e fausia le maota o le Alii—o se malumalu latou te auai ai i sauniga fou ua toefuatai mai ma maua ai faaeega paia ua folafolaina.

I le faaaliga na maua i le aso na taunuu ai Iosefa i Katelani, na aoao mai ai e le Alii e faapea “Ma o le tatalo o lo outou faatuatua o le a outou maua ai laʼu tulafono, ina ia outou iloa le ala e pulea ai laʼu ekalesia ma ina ia saʼo mea uma i oʼu luma” (Mataupu Faavae ma Feagaiga 41:3). O le toatele o uluai tagata liliu mai i Katelani o auaiga o “le aiga” na nonofo i le Faatoaga a le au Morley. Sa taumafai lenei vaega e ola i mea ua latou malamalama ai o se lelei o le Feagaiga Fou o le “tuu tele [o a] latou mea uma” (Galuega 4:32). Na matauina e Iosefa Samita o taumafaiga a le aiga sa faaaloalogia ae sa le gafataulimaina. O le iloaina e ala i le tatalo o le faatuatua o le a faaalia e le Alii le tulafono folafolaina, na valaauina ai e Iosefa Samita se fonotaga a toeaiina e toasefululua i le aso 9 o Fepuari, 1831, na o le lima aso talu ona taunuu i Ohaio.

A o faagasolo le fonotaga, na mulimulitaia ai e i latou na auai le valaau a le Alii e auai faatasi moni lava i le tatalo. Ina ua uma ona latou “aufaatasi i le tatalo malosi, ma ua malilie i le taunuu i le talia o le Tulafono,”¹ na tuuina atu e toeaiina ni fesili e uiga i faatinoga ma manaoga o le Ekalesia. I le tali mai, na lauina ai e Iosefa Samita se faasologa o tali mai le Alii, lea na avea ma faavae o le faaaliga ua lauiloa o le tulafono o le faapaiaga ma le tausimea pe faafaigofie o le Tulafono (tagai Mataupu Faavae ma Feagaiga 42). Sa aoao mai e lenei faaaliga le Au Paia i le auala e faapotopoto ai, tausia ai e le tasi le isi, ma tulitulimatagau ai tulaga tutusa tau tamaoaiga e aunoa ma le le amanaia o filifiliga ma tiutetauave faaletagata lava ia.

A o galue ai pea i le faaliliuga o le Tusi a Mamona, sa faamoemoe ia Iosefa Samita ma Oliva Kaotui e faaaoga a la meaalofa i le “aumai[a] i le malamalama … o vaega na o a’u tusitusiga paia lea sa natia ona o le amioletonu” (Mataupu Faavae ma Feagaiga 6:27). Ia Oketopa 1829, na faatau mai ai e Iosefa ma Oliva se vaega tele o le Lomiga a King James o le Tusi Paia mai le faletusi a E.B. Grandin. Ia Iuni 1830, faatasi ai ma le Tusi a Mamona ua lomia nei ma le Ekalesia ua faatulagaina, na amata ai ona galulue Iosefa ma Oliva i le la faaliliuga tele lona lua: o le faaliliuga musuia o le Tusi Paia.

Ina ua tuua e Iosefa Samita le setete o Niu Ioka, ua leva ona faagasolo lana galuega o le faaliliuga musuia o le Tusi Paia. I le taimi lena, ua uma ona faamalauina atu e Iosefa ni iloiloga taua ma faaopoopoga tetele i le faaaliga a Mose ma le tala ia Enoka o loo maua i le Kenese.² O le aso na la taunuu ai ma Ema i Katelani, sa maua ai se faaaliga e faatonu ai le Ekalesia e “fausia se fale” mo Iosefa e “nofo ai ma faaliliu” (Mataupu Faavae ma Feagaiga 41:7). Na lagona e Iosefa Samita o lana galuega o le faia o ni iloiloga musuia o le Tusi Paia o se ”poloaiga faalelagi” ma o se “vaega” taua lea o lona valaauga o se perofeta.³ O le galuega a Iosefa Samita i ilogailoga o le Tusi Paia sa o se “afuaga tuusa’o mo le tele o faaaliga” i le Mataupu Faavae ma Feagaiga, faatasi ai ma le “silia ma le taseni o vaega ia na alia’e sa’o mai le faagasologa o le faaliliuga pe o iai faatonuga mo Iosefa ma isi e faatatau iai.”⁴

O le matafaioi o le faaliliuga o le Tusi Paia i le uunaia o faaaliga atonu e sili ona manino i le faaaliga na maua e Iosefa Samita ma Sini Rikitone i le aso 16 o Fepuari, 1832. I nai vaiaso na muamua atu, o taumafaiga a Iosefa Samita e vaai le galuega faafaifeautalai i le eria faataamilo o Hiram, Ohaio, sa aveesea ai o ia mai lana galuega o le faaliliuga. I se faaaliga na maua ia Ianuari 1832, na faatonuina ai o ia e le Alii e fa’aauau le faaliliuga ma ia taulai atu i lena galuega “se’ia maea” (Mataupu Faavae ma Feagaiga 73:4).

E itiiti ifo i le masina na sosoo ai, a o faaliliuina le Ioane 5:29, na tatala ane ai se faaaliga ia Iosefa Samita ma Sini Rikitone o lē sa avea ma tusiupu. Na lauiloa i le Au Paia i lea taimi o “e Faaaliga Vaaia,” o lenei faaaliga o loo iai ni faamatalaga fou lautele e uiga i le toetutu o e ua oti ma malo e tolu o le mamalu o loo faatali mai ia i tatou i le isi olaga (tagai Mataupu Faavae ma Feagaiga 76). I le ma le isi, ua aoaoina i tatou e lenei faaaliga e ala i a Keriso “ua iai lalolagi ma na foafoaina” ma i le avea ai o ”atalii ma afafine fanauina i le Atua,” o tamaitai ma alii uma ua iai se natura paia (Mataupu Faavae ma Feagaiga 76:24).

O le tele o faaaliga na mauaina i lea piriota na saunia ai se faamaninoga lautele mo le perisitua. Ina ua lomiaina nei faaaliga i le lomiga muamua o le Mataupu Faavae ma Feagaiga, o le tele lava na tuuina i ai le ulutala “Faatatau i le Perisitua” ma na “i ai se mea o le tusitaulima o le perisitua ma le pulega a le Ekalesia.”⁵

O nisi o nei faaaliga e faamalamalama mai ai ofisa ma korama patino ma a latou galuega tau pulega. Peitai, o nisi faaaliga, e otooto mai ai le aoaoga faavae o le Perisitua, faamatala lona natura e faavavau, ma aoao mai i tatou o le mana o le perisitua o le mana lea o le Atua e faatosina atu ai tamaitai ma alii ia te Ia e ala i feagaiga. I le aso 22 ma le 23 o Setema, 1832, na maua ai e Iosefa Samita se faaaliga umi i le perisitua a o fono i aufono ma vaega e lua o e umia le perisitua. O lenei faaaliga, na foliga mai na maua i le Faleoloa o N.K. Whitney & Co., ua tatou iloa ai o le Perisitua Mekisateko sa tuulima mai i lalo i perofeta amiotonu talu mai a o lei foafoaina le lalolagi (tagai Mataupu Faavae ma Feagaiga 84:6--17) ma “o ona sauniga, ua faaalia ai le mana o le faaleatua.” O lenei foi faaaliga ua tuu ai i latou ua umia le perisitua i lalo o se “feagaiga ma tautoga” lea afai latou te faalautele lo latou valaauga, o le a fa’amamaina i latou.

I luga o isi mea uma, o faaaliga na maua i Ohaio na faalautele ai le malamalama o le Au Paia o Aso e Gata Ai i le natura ma le Togiola a Iesu Keriso. I “Le Faaaliga Vaaia” (Mataupu Faavae ma Feagaiga 76) sa vaai ai Iosefa Samita ma Sini Rikitone i le Faaola o Iesu Keriso. Sa la’ua tautino mai:

“Ma o le talalelei lenei, o tala fiafia ia, na molimau mai e le siufofoga mai le lagi ia te i maʼua—

“E faapea na afio mai o ia i le lalolagi, o Iesu lava, e faasatauroina mo le lalolagi, ma tauave agasala a le lalolagi, ma faapaia le lalolagi, ma faamamā mai amioletonu uma;

Ina ia mafai ona faaolaina e ala ia te ia i latou uma o e na tuu e le Tamā i lona mana ma faia e ia” (Mataupu Faavae ma Feagaiga 76:40–42).

E lei leva ona mae’a le faapaiaina o le maota o le Alii i Katelani, ae toe faaali mai ai Keriso, ma folafola atu i a Iosefa Samita ma Oliva Kaotui:

“O a’u o lē muamua ma lē mulimuli; o a’u o lē o ola, o a’u o lē na fasia; o a’u o lo oulua fautua i le Tama.

“Faauta, ua faamagaloina a oulua agasala mai ia te oulua; ua oulua mama i o’u luma; o lea, ina siitia ae i luga o oulua ulu ma olioli.

“Ia olioli loto o o oulua uso, ma ia olioli loto o loʼu nuu uma, o e na latou fausia lenei fale i loʼu igoa, ma lo latou malosi” (Mataupu Faavae ma Feagaiga 110:4–6).

I le malumalu ua faapaiaina, sa maua ai e le Au Paia le faaeega o le mana lea sa folafolaina toeitiiti lima tausaga talu ai ina ua poloaiina i latou e faapotopoto i Ohaio. E ui ina sa faalauiloa atu sauniga ma faamanatuga faaopoopo e o faatasi ma “faaeega paia” i Navu, ae o le faaeega o le mana sa folafola mo le Au Paia i Katelani na aofia ai le “vaitau e pei o le Penetekoso” lea na sosoo ma le faapaiaga o le malumalu ma “le toefuataiga o ki o le perisitua” e ala mai i a Mose, Elaia, ma Elia i le Malumalu o Katelani (tagai Mataupu Faavae ma Feagaiga 110).⁶

O lenei faaeega paia o ki fou ma sauniga na sosoo ma le folafolaga a le Alii ua taliaina osigataulaga a le Au Paia i le fauga o le malumalu ma ua faamagaloina a latou agasala e ala i le Togiola a Keriso.