Fale o Peteru ma Maria Uitimera

O le faatoaga a Peteru ma Maria Uitimera o se tasi lea o nofoaga e sili ona taua i le uluai talafaasolopito o Le Ekalesia a Iesu Keriso o le Au Paia o Aso e Gata Ai. Sa nonofo iinei Iosefa ma Ema Samita ma Oliva Kaotui o ni malo faaaloalogia a le Aiga o Uitimera ina ua maea le la faaliliuga o le Tusi a Mamona. O le Faatoaga foi a Uitimera na asiasi atu ai le agelu o Moronae i molimau e toatolu ma faaali atu papatusi auro, lea na maua ai ni faaaliga taua, ma le mea na faatulagaina aloaia ai le Ekalesia a Iesu Keriso i le aso 6 o Aperila, 1830.

Sa feiloai Oliva Kaotui ia Tavita Uitimera i se taimi o le 1828 a o i ai Tavita i Palamaira mo se pisinisi. Na avea le toalua lea ma ni uo a o la talanoaina talaave o faaaliga a Iosefa Samita. Sa tumau ona fesoota le tasi i le isi i le taimi na fesoasoani ai Oliva i le faaliliuga i Haramoni. Ina ua manino sa manaomia e Iosefa ma Oliva le tele o ni taimi filemu nai lo le mea sa maua i Haramoni ina ia mafai ai ona faamae’a le faaliliuga, sa valaau atu Oliva i lana uo o Tavita mo se fesoasoani. Ia Me 1829, na malaga atu ai Tavita i Haramoni lea na ia feiloai muamua ai i le perofeta ma lona faletua. O le masina na sosoo ai, na ave ai e Tavita lana taavale solofanua i Penisilevania ma aumai ai Iosefa, Ema, ma Oliva e nonofo faatasi ma lona aiga.

Sa tuuina atu e le aiga o Uitimera le lagolago mo Iosefa Samita i se taimi taua tele a o ia galue e faataunuu lona valaauga faaperofeta. Sa tatala e Peteru ma Maria Uitimera ma lo latou aiga lo latou fale ma ola i le Perofeta a o nonofo faatasi ma ia i le latou faatoaga. O avea nisi tagata o le aiga o Uitimera o ni tusiupu i le taimi o le faaliliuga o le Tusi a Mamona. O Tavita Uitimera o se tasi o tamalii e toatolu na faaali atu i ai papatusi o le Tusi a Mamona i le faatoaga e se agelu a le Atua, ma sa avea foi Maria Uitimera ma se molimau o le Tusi a Mamona ina ua faaali atu e le agelu o Moronae [papatusi] ia te ia i le taimi o se asiasiga patino.

Ia Iuni 1829, na faafeiloai ai e Peteru ma Maria Uitimera ia Iosefa Samita ma Oliva Kaotui o ni tagata mautotogi i lo la fale. Ina ua mae’a ona faaliliu e Iosefa le Tusi a Mamona, sa faaali atu ia Oliva Kaotui, Tavita Uitimera, ma Matini Harisi ia papatusi ia faaliliuina mai ai le Tusi a Mamona i se nofoaga tuufua e latalata i le fale o Uitimera. Na tusia mulimuli ane e le toatolu se faamatalaga e faamautu ai le moni o le tusi lea ua lolomiina i lomiga uma o le Tusi a Mamona o le Mau a Molimau e Toatolu. Mulimuli ane, na molimau mai foi isi molimau e toavalu i le moni o papatusi auro ina ua faaali atu e le Perofeta ia i latou ia papatusi e latalata i Palamaira, Niu Ioka. O le toafa o nei molimau faaopoopo e toavalu o ni tagata o le aiga o Uitimera.

I le aso 6 o Aperila, 1830, sa faatulaga aloaia ai le Ekalesia a Iesu Keriso i le lalolagi. Pe tusa ma le 55 tagata—o e na malaga mai aai o Colesville, Manaseta, ma Feiete—na lagolagoina Iosefa Samita ma Oliva Kaotui e avea ma taitai o le Ekalesia. Mulimuli ane, na faamanuiaina ma tufatufa atu e Iosefa ma Oliva le faamanatuga o le Talisuaga a le Alii i le faapotopotoga ma faamauina nisi o tagata o e na papatisoina muamua o ni tagata o le Ekalesia fou ua faatulagaina. I le aso lava lea e tasi, na faasoa mai ai e Iosefa se faaaliga mai le Atua (Mataupu Faavae ma Feagaiga 21) i le faapotopotoga na faapotopoto ma o nisi o i latou na auai na papatisoina i le Vaituloto lata ane o Seneca. Mulimuli ane, sa faaaogaina le fale o Uitimera mo le tele o fonotaga taua e aofia ai uluai konafesi, mai le 1830 i le 1831.

O le au Uitimera sa o ni sui o se nuu tele e tautatala faa-Siamani lea na malaga mai Europa tutotonu i Penisilevania e saili le saolotoga faalelotu. Na siitia atu le aiga i Fayette, Niu Ioka i le amataga o le vaitau o le 1800 ma avea ai ma tagata faaaloalogia o lo latou nuu. Ia Tesema 1830, na poloaiina ai e se faaaliga na maua i le Fale o Uitimera le Ekalesia e “o atu i Ohaio” (Mataupu Faavae ma Feagaiga 37). O Aperila na sosoo ai, na faatau atu ai e le Aiga o Uitimera la latou faatoaga ma siitia atu faatasi ma le Au Paia na totoe i Katelani, Ohaio.

Faitau atili e uiga i le faatulagaina o le Ekalesia toefuataiina a Iesu Keriso i le Faatoaga a Uitimera i le Au Paia Voluma 1, Mataupu 8.

O Mea e Faamoemoe i Ai

O le Fale o Peteru ma Maria Uitimera o se vaega o le maimoaga taamilo e tuuina atu e faifeautalai i le Faatoaga a Uitimera. E amata le maimoaga taamilo i le Nofoaga Autu mo Tagata Asiasi lea e mafai ai e tagata asiasi ona matamata i se ata tomua ma matamata i faaaliga fesootai.

360° Faasologa