Faleoloa o Newel K. Whitney

I le 1826, na faatau mai ai e Newel K. Whitney se fanua i Katelani, Ohaio, e fau ai se faleoloa e faafesagai ma lona fale. Sa faagaoioia e Newel le faleoloa faatasi ma lana uo ma lana paaga faapisinisi o, Sini Gilbert. Na faatau atu e nei faatauoloa e toalua ni oloa eseese, ma o le tele lava e foliga mai na lafoina atu i Katelani e ala i le Vaituloto o Erie. O le Faleoloa o Newel K. Whitney sa avea foi ma nofoaga o le fale meli muamua o le taulaga. Ina ua taunuu atu le Au Paia i le 1831, sa avea le faleoloa ma se nofoaga o fonotaga ma faaaliga.

I le aso 4 o Fepuari, 1831, na taunuu ai le Perofeta o Iosefa Samita ma lona faletua maitaga o Ema, i Katelani i le Faleoloa o Newel K. Whitney. Sa taliaina ma le agalelei i laua e le au Whitney ma, i le lua tausaga mulimuli ane, na suia ai se vaega o le Faleoloa o Newel K. Whitney i se fale mo le Perofeta ma lona aiga. O le fogafale pito i luga o le faleoloa na avea ma se nofoaga o faaaliga ma sa avea ma laumua o le Ekalesia i Katelani mo se taimi. Na faamaeaina e Iosefa Samita lana faaliliuga musuia o le Tusi Paia a o nofo ai i le faleoloa ia Iulai 1833. Sa faia le Aoga a Perofeta i se potu i le fogafale lona lua. I lenei nofoaga, na faauuina ai e Iosefa Samita ni alii se toalua e avea ma fesoasoani ia te ia i le Au Peresitene Sili ma o le toatele o i latou na auai na vaaia se faaaliga vaaia faalelagi o le Faaola. O se tasi o faaaliga taua na maua e Iosefa i le Faleoloa o Newel K. Whitney o le Upu o le Poto (Mataupu Faavae ma Feagaiga 89) ina ua uma ona fesili atu Iosefa Samita i le Alii e uiga i le faaaogaina e alii o tapaa i taimi o fonotaga.

O le Faleoloa o Newel K. Whitney ua toefuataiina ua avea nei ma se vaega o le maimoaga taamilo i Katelani Faasolopito.

Faitau atili e uiga i le Newel K. Whitney Store i le mataupu e 15 o le Au Paia, voluma 1.

Savaliga 360°

O Mea e Faamoemoe i ai

O le Faleoloa o Newel K. Whitney o se vaega o se maimoaga taamilo taialaina i Katelani Faasolopito e tuuina mai e faifeautalai. E amata le maimoaga taamilo i le Nofoaga Autu mo Tagata Asiasi i Katelani Faasolopito ma e aofia ai le Faleoloa o Newel K. Whitney ma le fale o Whitney; e mafai foi ona aofia ai le Faletalimalo o Johnson, le fale Penuili o Whitney, ma le ili laupapa pe a talosagaina.