Fale o Newel ma Elizabeth Whitney

O Newel K. Whitney ma lona faletua o Elizabeth Ann Whitney, o uluai tagata na nonofo i Katelani, Ohaio, ma sa la sailia ni upumoni sili atu faalelotu. I le pe tusa o le 1828, na fegalegaleai ai le au Whitney ma Sini Rikitone ma ana aoaoga. Peitai, na laua maua se molimau mai le Atua e faapea, o le a faaalia mai le upumoni sili atu, o lea na la faatalitali ai ma le onosai. I le faaiuga o le 1830, na taunuu ai faifeautalai o le Au Paia o Aso e Gata Ai o Oliva Kaotui, Pale P. Palate, Ziba Peterson, ma Peter Whitmer Jr. i matusasae o Ohaio. I le taimi o se faasologa o fonotaga i le eria o Katelani, sa talai atu ai Kaotui ma Palate i tagata o le aulotu Papatiso Toefaafouina a Sini Rikitone. Ina ua uma ona papatisoina Rikitone, na papatisoina ai foi nisi o tagata o lana faapotopotoga, e aofia ai Newel ma Elizabeth Ann Whitney.

Ina ua taunuu Iosefa Samita ma lona faletua o Ema i Katelani i le aso 4 o Fepuari, 1831, sa aumai sa’o i laua e Newel Whitney “i [lona] fale” (Whitney, Woman’s Exponent, 1 Sete., 1878, 51). Sa faamamaluina le au Whitney i le i ai o le Perofeta ma lona faletua i lo latou fale.

Sa faaaluina e Iosefa ma Ema Samita lo la masina muamua i Ohaio e nonofo ai i le fale o Whitney. I le taimi na nonofo ai le au Samita ma le au Whitney, na avea le fale o Whitney ma se nofoaga o fonotaga ma faaaliga mo le Au Paia. I lenei fale, e toatele tagata liliu mai na muai faalogo i le talalelei toefuataiina, na faaali mai ai tofiga ma ni faalapotopotoga fou, ma sa sili atu ona faatuina atoatoa le Ekalesia. I le aso na taunuu ai Iosefa ma Ema i Katelani, na maua ai e Iosefa se faaaliga—ua lauiloa nei o le Mataupu Faavae ma Feagaiga 41—lea na tofia ai Eteuati Paterika e avea ma epikopo muamua o le Ekalesia, o se tofiga lea o le a valaauina ai foi Newel K. Whitney i se isi faaaliga na maua (atonu foi i le fale o le au Whitney) ia Tesema 1831 (tagai i le Mataupu Faavae ma Feagaiga 72:1–8). I le taimi lea, na maua ai e Iosefa ni faaaliga se fa, ia ua lolomiina nei i le Mataupu Faavae ma Feagaiga (vaega 41–44).

A o auauna atu o se epikopo i Katelani, sa faia ai e Newel K. Whitney se tausamaaga e tolu aso mo e matitiva, e ogatusa ma le faataitaiga a le Faaola ma le tulafono o le faapaiaga (tagai i le Mataupu Faavae ma Feagaiga 42:30–39). Sa galulue soosoo tauau Ema Samita ma Elisapeta Ann Whitney e tautuaina malō.

O le Fale o Newel ma Elizabeth Whitney ua toefaatuina ua avea nei ma se vaega o Katelani Faasolopito.

Faitau atili e uiga i le Fale o Newel ma Elizabeth Whitney i le mataupu e 11 o le Au Paia, voluma 1.

Savaliga 360°

O Mea e Faamoemoe i ai

O le Fale o Newel ma Elizabeth Whitney o se vaega o se malaga taamilo taialaina e ofoina mai e faifeautalai i Katelani Faasolopito.