Katelani Faasolopito

Ia Tesema 1830, na poloaiina ai e le Alii le Au Paia o Aso e Gata Ai e tatau ona latou “faapotopoto faatasi i le Ohaio” (Mataupu Faavae ma Feagaiga 37:3). I se faaaliga na maua i le masina na sosoo ai, na folafola mai ai e le Alii o le a maua e le Au Paia i Ohaio Lana tulafono, faaeeina i le mana mai luga, ma saunia e faasoa atu Lana talalelei i atunuu uma (Mataupu Faavae ma Feagaiga 38:32–33). I Ohaio, na fausia ai e le Au Paia se malumalu—o se nofoaga o aoaoga, tapuaiga, ma faaaliga. Na maua e Iosefa Samita le tele o faaaliga e taiala ai le taitaiga o le Ekalesia toefuataiina a le Faaola ma taiala ai olaga taitoatasi o tagata o le Ekalesia.

O loo maua maimoaga taamilo ma faaaliga i le nofoaga i le tausaga atoa e faasoa mai ai aafiaga o uluai tagata o Le Ekalesia a Iesu Keriso o le Au Paia o Aso e Gata Ai o e na faapotopoto i Katelani i le vaitau o le 1830. Ua valaaulia tagata asiasi e maimoa faataamilo i le Faleoloa o N.K. Whitney & Co. , Maota o Newel ma Elizabeth Ann Whitney, le Fale Penuili ua toe faafouina o N.K. Whitney, se fausaga o le ili laupapa, se faleaoga, o le Fale Talimalo o John Johnson, o le Fale o Iosefa ma Ema Samita ua toe faafouina, ma le Malumalu o Katelani.

Mo le tele o tausaga, sa faasaoina ma tausia ai e le Community o Christ le Malumalu o Katelani. I le aso 5 o Mati, 2024, na liliu atu ai le umiaina ma le tausimea o lenei faailoilo pele i Le Ekalesia a Iesu Keriso o le Au Paia o Aso e Gata Ai.