Ili Laupapa

Ina ua poloaiina le Au Paia i Katelani, Ohaio, e fausia se malumalu, sa itiiti ni a latou punaoa. O se tasi o auala na latou foia ai lenei faafitauli o le fausia lea o se ili laupapa ina ia mafai ona latou vave gaosia laupapa e faaaoga i le fausiaina o le malumalu. I le 1833, na fausia ai se ili laupapa i Laufanua Mafola o Katelani i le itu i saute o le Faleoloa o Newel K. Whitney. E sefuluono eka o le vaomatua ua leva ona tutupu sa faatauina mai foi e tatuu mo laupapa. O Joel H. Johnson, o se tagata liliu mai ma o se tagata tomai i masini faufale, na tofia e vaaia le ili laupapa.

Sa faaaoga laupapa mai le ili laupapa mo le taualuga, sooga tafatolu, ma le olo o le Malumalu o Katelani. E foliga mai sa tuufaatasia pulelaa o le perisitua i le fale gaosi laupapa i le ili laupapa a o lei faapipiiina i le malumalu. Sa faaaoga e le au kamuta se ili laupapa e alu i le vai na maua i le ili laupapa e tipi ai ni mamanu lavelave o loo maua i galuega i laupapa o le malumalu. O le toatele o alii sa galulue i le ili laupapa na foai atu o latou taimi ma galulue i le galuega faatino o le fausiaina o le malumalu. Ina ua maea le malumalu, sa faaaoga le ili laupapa e fesoasoani e maua ai se tupe maua e totogi ai le aitalafu na maua mai le galuega faatino o le fausiaina.

O le ili laupapa i Katelani Faasolopito o se faatusa atoatoa ona lelei lea na fausia i le nofoaga na i ai muamua. Mo mafuaaga o le saogalemu, tatou te le faagaoioia ai le ili laupapa. E mafai e tagata asiasi i Katelani Faasolopito ona asiasi atu i le ili laupapa o se nofoaga latou te filifili pe malolo ai i le latou maimoaga taamilo. E amata maimoaga taamilo i le Nofoaga Autu mo Tagata Asiasi i Katelani Faasolopito.

Savaliga 360°

O Mea e Faamoemoe i ai

O le ili laupapa o se vaega e filifili ai o le maimoaga taamilo taialaina lea e ofoina atu e faifeautalai i Katelani Faasolopito. O le ala puupuu (0.1 maila) e tau atu i le ili laupapa ma le fale penuili e feoloolo le tifato ma e ufitia i iliga laupapa. O nisi taimi o aa o laau, o laufanua e le laugatasi, ma isi lamatiaga e lāvea ai e ono faigata ai ona feoai tagata asiasi e tapulaa le feoai.