Malumalu o Katelani

Ia Tesema 1832, sa poloaiina ai e le Alii le Au Paia i Katelani, Ohaio, e fau “se fale o le Atua” (Mataupu Faavae ma Feagaiga 88:119). O le a avea o se “fale tatalo lea, o se fale o le anapogi, o se fale o le faatuatua, o se fale o le aoaoga, o se fale o le mamalu, o se fale maopoopo, o se fale o le Atua.” Sa ositaulagaina e le Au Paia i Katelani le taimi ma tupe e fausia ai le maota o le Alii. Sa latou faatuatua o le a fesoasoani le Alii ia i latou e faataunuu Lona finagalo. Na faamaeaina le malumalu i le faaiuga o le 1835 ma faapaiaina i le aso 27 o Mati, 1836 (Mataupu Faavae ma Feagaiga 109).

Sa tauia le faatuatua o le Au Paia i le liligiina mai o faaaliga faaleagaga i le Malumalu o Katelani ua mae’a. I le taimi o le faapaiaga, na lipotia mai e nisi o tagata na auai na latou vaai i agelu. “E leai se gagana faaletino e mafai ona faamatalaina faaaliga faalelagi o lena aso e le mafaagaloina,” na tusia mulimuli ane ai e Eliza R. Snow, o lē sa i ai i le malumalu mo le faapaiaga. “Na faaali mai agelu i nisi, a o iloaina e tagata uma sa i ai se lagona o le mafutaga faalelagi, ma na faatumuina loto taitasi uma i le ‘olioli e le matalatalaina, ma tumu i le viiga.’”¹ Na lipotia mai e nisi sa i fafo o le malumalu, “le faalogoina o se leo uiga ese mai i totonu [o le malumalu], ma vaaia se malamalama susulu e pei o se afi faaniutu o faamalumalu ifo i luga o le malumalu.”²

I le aso 3 o Aperila, 1836, i le tasi o le vaiaso talu ona uma le faapaiaga, na toeitiiti atoa le afe o le Au Paia o Aso e Gata Ai na faapotopoto e tapuai i le Alii i le Malumalu o Katelani. Ina ua mae’a le faatinoga o le faamanatuga, sa o atu le Perofeta o Iosefa Samita ma Oliva Kaotui i pulelaa o le Perisitua Mekisateko ma tuutuu ifo i lalo se veli po o se pupuni ina ia le punitia ai i laua. Ina ua uma ona la punonou i le “tatalo paia ma le filemu,” sa tatalaina mai se faaaliga lea na asiasi atu ai Iesu Keriso ia i laua, o lē na fofogaina mai ua Ia taliaina le maota sa latou fausia. Ona asiasia lea o Iosefa ma Oliva e ni avefeau faaopoopo se toatolu: o Mose, Elaia, ma Elia. Na tuuina atu e Mose ia i laua “ki o le faapotopotoina o Isaraelu” (Mataupu Faavae ma Feagaiga 110:11), na tuuina atu e Elaia ia i laua “le aia tatau e tuuina atu ai faamanuiaga tulaga ese o le feagaiga faa-Aperaamo,”³ ma na tuuina atu e Elia ia i laua le mana o faamauga “e liliu atu ai loto o tamā i fanau, ma fanau i tamā” (Mataupu Faavae ma Feagaiga 110:15).

Mo le fiasefulu o tausaga, sa faasaoina ma tausia ai e le Community of Christ le Malumalu o Katelani. Ia Mati 2024, na liliu atu ai le tausimea o lenei faailoilo pele i Le Ekalesia a Iesu Keriso o le Au Paia o Aso e Gata Ai.

Faitau atili e uiga i le Malumalu o Katelani i le mataupu e 21 o le Au Paia, voluma 1.

---

1. Edward Tullidge, Women of Mormondom, 95.
2. History, 1838–1856, volume B-1 (1 September 1834–2 November 1838), addenda, 4; www.josephsmithpapers.org
3. Russell M. Nelson, “O Le Feagaiga e Faavavau, Liahona, Oke. 2022,9; https://folky.shop/study/liahona/2022/10/04-the-everlasting-covenant?lang=smo

O Mea e Faamoemoe i ai

O malaga maimoa taialaina o le Malumalu o Katelani e amata i le Nofoaga Autu mo Tagata Asiasi o le Malumalu o Katelanima e tusa ma le tasi le itula le umi. O le malaga maimoa e mafai ai e tagata asiasi ona asiasi i fogafale uma e tolu o le malumalu e aoao atili ai e uiga i lona fausiaina ma le faaaogaina i le vaitau o le 1830.